Túrkistanda «Sarasóz» ádebı-tanymdyq jýrnalynyń tusaýkeseri ótti
ASTANA. QazAqparat - Búgin Túrkistan qalasyndaǵy Túrik tildes halyqtar kitaphanasynda ádebı-tanymdyq «Sarasóz» jýrnalynyń tusaýkeser rásimi ótti.
Jańa jýrnaldyń tusaýkeser lentasyn Túrkistan qalasy ákiminiń orynbasary Ǵanı Rysbekov, QR-nyń Halyq ártisi, professor Q.Bekbosynov qıyp, basylym redaktoryna ıgi tilekterin jetkizdi. Jýrnaldyń súıinshi nómiri sáýir aıynda 2000 danamen jaryq kórgen bolatyn.
Sharaǵa kelgen qonaqtar arasynda, ádebıet synshysy, professor Q.Ergóbek, QR Mádenıet qaıratkeri, dotsent S.Eleýov, ulaǵatty ustaz, professor S.Sadyqov, sharanyń júrgizýshisi, professor B.Serdáli, fılılogııa ǵylymdarynyń kandıdaty, dotsentter B.Ospanova, J.Ismaılova men taǵy da basqa azamattar bar. Barlyǵy da jýrnaldyń jaryq kórýine oraı jyly lebizderin bildirip, quttyqtaýlaryn jetkizdi. Óner tarlandary Q.Bekbosynov, S.Eleýov án-jyrdan shashý shashty.
Elbasy Nursultan Nazarbaevyń «Bolashaqqa baǵdar: rýhanı jańǵyrý» baǵdarlamalyq maqalasyndaǵy «HHІ ǵasyrdaǵy ulttyq sana týraly» atalatyn І bólimde Ulttyq biregeılikti saqtaý týraly Memleket basshysy: «Ulttyq salt-dástúrlerimiz, tilimiz ben mýzykamyz, ádebıetimiz, joralǵylarymyz, bir sózben aıtqanda ulttyq rýhymyz boıymyzda máńgi qalýǵa tıis. Abaıdyń danalyǵy, Áýezovtiń ǵulamalyǵy, Jambyldyń jyrlary men Qurmanǵazynyń kúı¬leri, ǵasyrlar qoınaýynan jetken babalar úni - bular bizdiń rýhanı mádenıetimizdiń bir parasy ǵana», - degen bolatyn. Osyǵan qaraı jýrnaldyń jaryqqa shyǵýy Memleket basshysy aldyǵa qoıyp otyrǵan mindetterdiń údesinen shyǵady deýge bolady.
Túrkistan - túrki áleminiń mádenı astanasy atanýymen bir mezette tuspa-tus kelip otyrǵan mereıli shaqta jaryq kórgen jýrnaldyń alǵashqy sanynda «Tutas túrkiniń toıy tarqamasyn» degen redaktor maqalasynda túrki birligi pash etilgen. Redaktor G.Qarybek: «Maqsatymyz - dúıim jurtty materıaldyq ıgilik ıektep, rýhanııat qundylyǵy álsirep ketken osy bir tusta qazaqty órkenıetke bastaý. Qazirgi jahandaný zamanynda ulttyq bolmysymyzdy baǵalap, ulttyq qundylyǵymyzdy kózdiń qarashyǵyndaı saqtaı otyryp adamzattyq úderiske qosylý. «Sarasóz» ustanymy - órkenıet bıigine jol tartý. Arzan sózdiń ýaqyty ótti, endigi kezek ulttyń jadyn qaýzaıtyn, janyn marqaıtatyn sarasózdiki bolar. «Sarasózdiń» aıtpaǵy - tyńdaýshy túzeldi, sen de túzel qazaq balasy! Arzan sóz usynbaýǵa - biz, asyl sózdi qabyldaýǵa - Siz ýáde beriselik!»- deıdi zııaly qaýymǵa arnaýynda.
