Túrkistanda salynyp jatqan nysandardyń sapasy qatań baqylaýda - ákimdik

TÚRKІSTAN. QazAqparat - Túrkistan oblysynda ótken jyly 752 nysannyń qurylys-montajdaý jumysy bastalǵan. Onyń ishinde 445 nysan - bıýdjet qarajaty, 307 nysan - jeke kásipkerlik qarajaty esebinen salynýda, dep habarlaıdy QazAqparat óńirlik kommýnıkatsııalar qyzmetine silteme jasap.

Túrkistan oblysy memlekettik sáýlet-qurylys baqylaýy basqarmasy óńirdegi qurylys sapasyna baqylaý jasaıdy. Ásirese, oblys ortalyǵy Túrkistan qalasyndaǵy barlyq jańa ǵımarattardyń qurylys normalaryna saı bolýy qatań baqylaýda. Bul týraly Óńirlik kommýnıkatsııalar qyzmetinde ótken brıfıngte oblystyq memlekettik sáýlet-qurylys baqylaýy basqarmasynyń basshysy Muhıt Turysbekov málimdedi.

Jalpy basqarma tarapynan 5 memlekettik kyzmet kórsetiledi. Bul qyzmetter 2019 jyldyń basynan beri 100% elektrondy túrde kórsetilýde. Ótken jyly qurylys salasynda lıtsenzııa alýǵa, qaıta tirkeýge, attestat alýǵa qatysty barlyǵy 665 ótinish qabyldanǵan.

«Oblystaǵy zań talaptaryn saqtamaı salynǵan 69 bıýdjettik jáne 144 jeke kásipkerlik, barlyǵy – 213 qurylys nysanyna tekserý júrgizilgen. Nátıjesinde anyqtalǵan zańbuzýshylyqtar negizinde shara qabyldanyp, hattama toltyryldy. Basqarma salǵan ákimshilik aıyppuldyń jalpy somasy – 62 149 861,5 teńge, óndirilgeni – 54 850 000 teńge», - dedi Muhıt Seksenbaıuly.

Qazirgi tańda basqarma tarapynan Túrkistan qalasynda qurylys-montajdaý jumystary júrgizilip jatqan 170 bıýdjettik nysan qurylysy qadaǵalanýda, onyń ishinde: kópqabatty turǵyn úı qurylysy – 85; áleýmettik nysan qurylysy – 56; ınjenerlik kommýnıkatsııa júıeleri qurylysy – 29.