Túrkistanda salynatyn halyqaralyq áýejaıdyń orny áli bekitilmegen - bas sáýletshi
TÚRKІSTAN. QazAqparat - Túrkistan qalasynda salynatyn halyqaralyq áýejaıdyń orny áli bekitilmegen. Bul týraly oblystyq Sáýlet jáne qala qurylysy basqarmasynyń basshysy Erkin Júsipov málimdedi, dep habarlaıdy QazAqparat tilshisi.
Aıta keteıik, elimizdegi birqatar aqparat quraldarynda Túrkistan qalasynan salynatyn áýejaı Kentaý qalasyna qarasty Shaǵa aýylynyń mańynan salynady degen aqpar taraǵan bolatyn. Alaıda málimetti oblystyń bas sáýletshisi rastamady. Onyń sózinshe, bastapqy kezde áýejaıdy salýǵa bolady degen jeti oryn qarastyrylǵan.
«Arnaıy komıssııa qurylyp, jan-jaqty zertteý jumystary júrgizildi. Osy jeti orynnyń ishinen Túrkistan qalasynan 20 shaqyrymdaı jerde ornalasqan Shaǵa aýylynyń mańy qolaıly dep tańdalyp alyndy. Ol jobany biz 16 qazanda Investıtsııalar jáne damý mınıstrligine joldadyq. Qazir sol jaqta qaralyp jatyr. Naqty áli bekitilgen joq. Bekitilgen jaǵdaıda oblys ákiminiń arnaıy qaýlysy shyǵarylady», - dedi Erkin Júnisov.
Al, oblystyq Jolaýshylar kóligi jáne avtomobıl joldary basqarmasy basshysynyń orynbasary Maqsat Myrzabaevtyń aıtýynsha, Investıtsııalar jáne damý mınıstrliginen shyǵatyn qortyndy keler jyldyń qańtar nemese aqpan aılarynda shyǵýy múmkin.
«Áýejaıdyń aýmaǵy shashamen myń gektarǵa jýyq jerdi alady. Tıisti talaptarǵa sáıkes ol aýmaqta gaz qubyrlary bolmaýy kerek, qustardyń ushýy da eskeriledi. Ushaqtardyń ushyp qonýyna barlyq jaǵdaı jasalýy kerek. Geologııalyq zertteý ınstıtýty men aeronavıgatsııa, azamattyq avıatsııadan osy jaǵdaılardyń bárine zerdeleý jumystaryn júrgizetin bolady. Ol jaqtardan mamandar kelip ózderi tekseredi. Sondaı-aq «arheologııalyq qazba jumystary júrgizile me, sondaı tarıhı oryndar bar ma» degen saýaldardy Mádenıet jáne sport mınıstrligine joldadyq. Ol jaqtan jaýaptar kútiledi», - deıdi Maqsat Myrzabaev.
Túrkistan qalasynyń bas sáýletshisi Jandos Tasov áýejaıdyń jartylaı memlekettik-jekemenshik áriptestik aıasynda salynatynyn aıtady.
«Áýejaıdy salýǵa ınvestorlar tartylmaq. Ázirge túrik kompanııasy 40 mlrd teńge shamasynda qarajat jumsap, qurylys júrgizýge qyzyǵýshylyq tanytyp otyr. Qazir bul kompanııanyń qujattaryn memlekettik-jekemenshik áriptestik retinde tirkeý úshin mınıstrlikke joldandy. Al, oblys bıýdjetinen 10 mldr teńge bólý qarastyrylyp otyr. Bul qarajat áýejaı salynatyn orynǵa ınfraqulym júrgizýge jumsalmaq»,-dedi Túrkistan qalalyq sáýlet jáne qala qurylysy bóliminiń basshysy Jandos Tasov.
