Túrkistanda «Rýhanı kerýen» jobasynyń múshelerimen kezdesý ótti
Túrkistan jáne Almaty oblystyq máslıhattarynyń qoldaýymen, Almaty oblysynyń din isteri basqarmasy men Túrkistan oblystyq qoǵamdyq damý basqarmasy uıymdastyrýymen ótkizilgen keleli kezdesýde qonaqtar men Túrkistan jurtshylyǵy pikir almasyp, taǵylymdy oımen bólisti.
Kıeli Túrkistan jerine kelgen mártebeli qonaqtar aldymen Q.A.ıAsaýı kesenesine zııarat etip, ata-baba rýhyna quran baǵyshtady. Budan soń qalalyq mádenıet úıinde uıymdastyrylǵan kezdesýge qatysty.
Júzdesýde Túrkistan oblystyq máslıhatynyń hatshysy Qaırat Balabıev búgingi sharanyń mańyzdylyǵyn erekshe ataı kele, «Eldik jobanyń túrki halyqtarynyń kıeli mekeni – Túrkistan óńirine taban tireýi rýhanı sapardyń mánin aıshyqtaǵandaı. Jetisý óńirine qarasty shekara aımaqtaryn aralaǵan «Rýhanı kerýen» ІІІ kezeńiniń sapary Elbasynyń «Rýhanı jańǵyrý» baǵdarlamalyq maqalasyn, din salasyndaǵy memlekettik saıasatty júzege asyrý, áriptestik baılanysty nyǵaıtý, dinniń asyl qundylyqtaryn, ulttyq, mádenı salt-dástúrimizdi jan-jaqty dáripteıdi. Sol sebepti, ulan-ǵaıyr jeri men asa baı rýhanı tarıhy bar elmizdiń qasıetti uǵymyn ulyqtaý árbir azamattyń paryzy dep bilemin» - dedi.
Al, sharaǵa qatysqan Almaty oblysy máslıhatynyń hatshysy Sultan Dúısenbınov, Almaty oblystyq din isteri basqarmasynyń basshysy Rahmet Esdáýletov, Qazaqstan Respýblıkasy Bilim jáne ǵylym mınıstrligi, ǵylym komıtetiniń fılosofııa, saıasattaný jáne dintaný ınstıtýtynyń aǵa ǵylymı qyzmetkeri, Respýblıkalyq aqparattyq túsindirý top múshesi, dintanýshy, Phd doktory - Almasbek Shaǵyrbaev, oblystyq «Jetisý» telearnasynyń bas prodıýseri, «Jetisý» gazeti bas redaktorynyń orynbasary, Qazaqstan Respýblıkasynyń mádenıet qaıratkeri, Qazaqstan Respýblıkasynyń aqparat salasynyń úzdigi, aqyn Jumataı Ámireev te arnaıy sóz sóılep, Elbasynyń baǵdarlamalyq maqalasynda kórsetilgen basty baǵyttar boıynsha berilgen tapsyrmalar týraly oı qozǵady.
Jıyn sońynda Túrkistan oblystyq qoǵamdyq damý basqarmasy men Almaty oblysynyń din isteri basqarmasynyń arasynda yntymaqtastyq jóninde memorandýmǵa qol qoıyldy.
Aıta keteıik, Elbasynyń «Bolashaqqa baǵdar: rýhanı jańǵyrý» baǵdarlamasy aıasynda 2017 jyly bastaý alǵan respýblıkalyq jobanyń ІІІ kezeńi 6 baǵyt boıynsha Almaty oblysynyń 11 aýdanynyń shekara aımaqtaryn qamtyp ótken bolatyn.
Bıyl «Rýhanı kerýen» jobasynyń aıasy keńeıip, «Jer jánnaty – Jetisý jerinen Túrki halyqtarynyń kıeli mekeni – Túrkistan óńirine» sapar uıymdastyrylyp otyr.
Maqsat - Qazaqstan halqynyń dástúrli rýhanı mádenıetin elimizde ilgeriletý, memleketimizdiń rýhanı tiregi bolǵan asyl dinimizdiń jalpyǵa ortaq adamgershilik qaǵıdalaryn dáripteý.
Kelesi jyly «Rýhanı kerýen» jobasy boıynsha túrkistandyqtar Jetisý jerine arnaıy saparǵa shyǵatyn boldy.
Sondaı-aq kezdesý sońynda Súıinbaı atyndaǵy Almaty oblystyq fılarmonııasynan kelgen ánshilerdiń kontserttik baǵdarlamasy kópshilik nazaryna usynyldy.
