Túrkistanda «Rámizder alańy» alleıasy ashyldy
ShYMKENT. QazAqparat - Túrkistanda «Rámizder alańy» alleıasy ashyldy. «Túrkistan - túrki áleminiń mádenı astanasy» jyly aıasynda paıdalanýǵa berilgen alańnyń ashylý saltanatyna oblys ákimi Janseıit Túımebaev qatysty, dep habarlaıdy QazAqparat tilshisi.
«Rámizder alańynda» kók aspandy tilip ushqan qyrannyń, jer men kóktiń arasynda qalyqtaǵan tulpardyń, sondaı-aq Ánurannyń bıik tuǵyry ornaǵan. Munda eldik muratty meńzegen qanatty sózder arnaıy tastaqtaǵa jazylǵan. Táýelsizdik pen memleket sımvolyna aınalǵan rámizder alańynyń kıeli shaharda boı kóterýi - rýhanı jańǵyrýdyń alǵashqy qadamdary deýge bolady. Jańa nysanda kópshiliktiń demalysy úshin bar jaǵdaı jasalǵan. Sý syldyrymen ásem úndesken, áýezdi sýburqaq ta alańnyń kórkine ár berip tur. «Rámizder alańyndaǵy qanatty sózder urpaqtarǵa úlgi bolatyn, alǵa jeteleıtin sózder. Sol tasqa basylǵan sózderdi óskeleń urpaq osy baqty aralap júrgende oqyp júrsin, sińirip júrsin. Bul bizdiń elimizdiń egemendigin, táýelsizdigin qorǵaýǵa baǵyttaıtyn rýhanı kúsh, rýhanı qarý. Osyndaı rýhtanǵan azamattardy, eldi eshkim jeńe almaıdy»,- dedi Janseıit Túımebaev.
Qasıetti shaharda alańnyń ashylýy halyqqa úlken qýanysh syılady. Bul úlken bir ıgilikti istiń bastaýy bolmaq.
Nysanda negizgi element retinde jalpy bıiktigi 62,5 metrdi quraıtyn tý ornatylǵan.
Sonymen qatar, túrli kishi arhıtektýralyq formalar men sý burqaǵy ornatylǵan. Jańadan boı kótergen Qazaqstan Respýblıkasy Týy ilingen tuǵyrdyń bıiktigi 62,5 metrdi quraıdy. Al, Týdyń eni 12 metr bolsa, uzyndyǵy 24 metr. Nysannyń smetalyq quny - 226,302 mln teńgeni quraıdy. Qurylysy maýsym aıynda bastalyp, qazan aıynda aıaqtalyp otyr.
