Túrkistanda polıtsııadan qashqan kólik júrgizýshisi mert boldy

TÚRKІSTAN. QazAqparat - Túrkistan oblysynda birneshe kólik soqtyǵysqan jol apaty boıynsha tergeý júrip jatyr, – dep habarlaıdy QazAqparat tilshisi.

Oqıǵa 28 qyrkúıek kúni Tólebı aýdany Kóksaıek aýylynda bolǵan. Vaz-2103, Audi 100, Mazda 626 kólikteri soqtyǵysyp, bir adam kóz jumdy.

Túrkistan oblysy polıtsııa departamentiniń baspasóz qyzmeti taratqan málimetke súıensek, Tólebı aýdandyq polıtsııa bóliminiń tártip saqshylary júrisi kúdik týdyrǵan kólikti toqtatpaqshy bolǵan. Al, kólik ıesi odan saıyn jyldamdyqty asyryp, qasha jónelgen. Sodan qashqan avtokólik basqa da kólikterge soqtyǵysqan. Jol apaty saldarynan Vaz 2103 kóliginiń júrgizýshisi oqıǵa ornynda mert bolyp, onyń jolaýshysy men Audi 100 avtokóliginiń júrgizýshisi túrli dene jaraqattarymen aýrýhanaǵa tústi.

«Oqıǵa ornyna Tólebı APB-nyń basshylyǵy men prokýrorlar, jedel-tergeý toby shyqty. Atalǵan jaıt Tólebı APB-ǵa QR QK-niń 345-babynyń 3-bóligimen tirkeldi. Sol kúni qajetti birqatar saraptamalar taǵaıyndaldy. Al qaıtys bolǵan júrgizýshiniń týystary jol apaty boıynsha polıtsııa qyzmetkerleriniń ústinen aryzdandy. Olardyń shaǵymy birden tirkeýge alynyp, Túrkistan oblysy polıtsııa departamentiniń ózindik qaýipsizdik basqarmasy qyzmettik tergeý júrgizip jatyr» - delingen Túrkistan oblysy polıtsııa departamentiniń baspasóz qyzmeti taratqan habarlamada.

Qazirgi tańda jol apatynyń sebep-saldary men mán-jaıyn anyqtaýǵa qatysty jan-jaqty tergeý amaldary júrgizilýde. Saraptama nátıjesi de kútilip otyr. Zańǵa sáıkes saraptama qorytyndysymen naqty protsessýaldyq sheshim qabyldanatyn bolady. Atalǵan isti Túrkistan oblysy polıtsııa departamentiniń bastyǵy jeke baqylaýyna alǵan.

Foto: polisia.kz