Túrkistanda polıtseıler meıramhanada ótip jatqan úılený toıyn tarqatty
Túrkistan oblysynyń aýmaǵynda turǵyndar arasynda koronavırýs ınfektsııasynyń taralý qaýpine baılanysty karantın rejımi engizilgeni belgili.
Alaıda, sanıtarlyq jáne shekteý sharalaryn elemeıtin azamattardyń sany azaımaı otyr. Quqyqbuzýshylar úılený jáne otbasylyq is-sharalardy ótkizý arqyly shaqyrylǵan týystary men qonaqtardy, jaqyndarynyń densaýlyǵyna qaýip tóndirýde.
«Máselen, Túrkistan oblysynyń ortalyǵynda Túrkistan JPQ QPB qyzmetkerleri jergilikti turǵyndardyń biriniń karantın sharalaryn buzý jaıtyn anyqtady. Reıd barysynda meıramhanalar, kafeler men basqa da adam kóp jınalatyn oryndardy tekserý kezinde polıtsııa qyzmetkerleri ótip jatqan toıdy toqtatty. Osydan soń tártip saqshylary úılený toı uıymdastyrýshylarymen jáne qatysýshylarymen túsindirý áńgimesin júrgizip, qonaqtardy toıhanadan taratty» delingen habarlamada.
Toıhana ákimshisi men toı uıymdastyrýshysyna qatysty QR ÁQBtK 425-baby boıynsha ákimshilik hattama toltyryldy. Jınalǵan materıaldar zańdy sheshim qabyldaý úshin tıisti organdarǵa jiberildi.
Óz kezeginde Túrkistan oblysynyń polıtseıleri azamattarǵa koronavırýsqa baılanysty engizilgen karantın sharalaryn mindetti túrde qatań saqtaýdy eskertedi.
Bas sanıtar dárigerdiń qaýlysynyń talaptaryn qatań saqtaý, betperde kııý jáne araqashyqtyqty saqtaý qajet.
