Túrkistanda polıtseıler 5-qabattan sekirmek bolǵan er adamdy qutqardy
Oqıǵa ornyna patrýldik polıtsııanyń ekıpajy shuǵyl jetken.
Otbasylyq janjal bolyp jatqan úıdiń otaǵasy esikti ashýdan bas tartqan soń, ýchaskelik polıtsııa ınspektorlary polıtsııa kapıtandary Tórebek Omarov pen Sáden Seribaevtar, Tótenshe jaǵdaı departamentiniń qyzmetkerleri de jedel janjal ornyna barǵan.
Alaıda polıtseılerdiń kelgenine ashýlanǵan er adam esikti ashpaıdy. Al ishki jaqtan áıeldiń kómektesińder degen daýysy shyǵyp jatty. Sodan soń polıtseıler esikti buzyp kirýden basqa jol joǵyn jetkizgende, úı ıesi 5-qabattaǵy balkonynan sekirip ketetinin aıtady. Jaǵdaı adam ómirine baılanysty
bolǵandyqtan tártip saqshylary ýaqyt joǵaltpaı, shuǵyl áreket etti. TO PD arnaıy
maqsattaǵy 4 birdeı bólinis qyzmetkerleri shaqyrtyldy. Olar kópqabatty úıdiń
syzbasymen jaqsylap tanysyp alyp, barlyq áreketterdi josparlady. Atalǵan 4
polıtseıdiń ekeýi úıdiń esiginiń aldynda esikti ashýǵa daıyndalyp tursa, taǵy ekeýi
arnaıy ákelgen qural-saımandarymen kópqabatty páterdiń shatyryna shyqty.
Shatyrda ornalasqan murjaǵa bıiktikten túsýge arnalǵan jipterin myqtylap baılaǵan
polıtseıler, jaýyngerlik kúres-tásilderin paıdalanyp, qajetti qurylǵymen balkonǵa
sekirip tústi. Osylaısha polıtseıler bir mezgilde jedel áreket ete aldy. Sodan keıin
úıde shý shyǵaryp, ózin óltirýge bekingen er adamdy ustap, qutqaryp qaldy.
Al er adamǵa qatysty QR ÁQBtK-niń 73-1-baby «Densaýlyqqa qasaqana jeńil
zııan keltirý» boıynsha ákimshilik hattama toltyryldy. Sonymen qatar «Turmystyq
zorlyq-zombylyqtyń aldyn alý týraly» QR Zańyna sáıkes Túrkistan qalasy
turǵynynyń jubaıyna qatysty onyń qaýipsizdigin qamtamasyz etý jáne profılaktıkalyq jumystar júrgizý úshin qorǵaý nusqamasyna alyndy.
Óz kezeginde kórshileri polıtseılerge alǵystaryn bildirdi.
