Túrkistanda polıtseı sýǵa batyp bara jatqan balany qutqardy
TÚRKІSTAN. QazAqparat – Túrkistan oblysyna qarasty Jetisaı aýdandyq polıtsııa bóliminiń anyqtaýshysy Marat Nurymbetov sýǵa batyp bara jatqan 12 jastaǵy balany qutqardy, dep habarlaıdy QazAqparat.
Oblystyq PD baspasóz qyzmetiniń málimetinshe, 2 aqpan kúni kúndizgi saǵat 16:50 shamasynda Jetisaı aýdandyq polıtsııa bóliminiń kezekshilik bólimshesine bir balanyń sýǵa aǵyp bara jatqany týraly habarlama kelip túsedi. Oqıǵa ornyna nebári úsh jarym mınýtta jetken polıtsııa kapıtany Marat Rahmetuly aǵysy qatty sýdan balany aman alyp qaldy.
«Polıtsııa bóliminen endi ǵana shyǵyp, kóligime bara jatqan bolatynmyn. Sýǵa aǵyp bara jatqan adam týraly habarlama túsken. Esh oılanbastan áriptesimmen birge kóliktiń dabylyn qosyp alyp, sol jaqqa qaraı tarttyq. Bar oıymyz balany aman alyp qalý boldy. Kanaldaǵy sý kóterilip, arnasy tolyp turǵan bolatyn. Oqıǵa ornyna jetken kezde kólikten shyǵyp, kıimimdi sheshtim de sýǵa súńgip kettim. Balanyń aǵyp bara jatqan jaǵyna qaraı aldynan shyǵyp ustap qalý úshin, barymdy salyp júze bastadym. Osylaısha balany qutqardym. Bastysy bala aman!», - deıdi polıtseı.
Jasóspirimdi sýdan alyp shyqqannan soń polıtseıler ony birden Jetisaı aýdandyq ortalyq aýrýhanasyna jetkizgen. Jol-jónekeı balaǵa alǵashqy medıtsınalyq kómek kórsetken. Qazir balanyń densaýlyǵyna tónip turǵan qaýip joq. Alǵashqyda jansaqtaý bólimine jatqyzylǵan jetkinshek qazirgi ýaqytta bólimshege aýystyrylǵan. Óz kezeginde balalaryn aman alyp qalǵan polıtseıge jasóspirimniń ata-anasy shynaıy alǵysyn aıtyp, rızashylyǵyn bildirýde.
