Túrkistanda polıtseı eki adamdy qaǵyp ketip, 7 jasar jetkinshek qaza boldy
ShYMKENT. QazAqparat - Túrkistanda polıtsııa qyzmetkeri baǵdarsham tusynda turǵan 22 jastaǵy jigit pen 7 jasar qyzdy qaǵyp ketti. Jol apaty saldarynan jetkinshek oqıǵa ornynda kóz jumdy, dep habarlaıdy QazAqparat HAA tilshisi.
Túrkistan qalalyq prokýratýrasynyń málimetinshe, qaıǵyly oqıǵa 1 naýryz kúni kúndizgi saǵat 11.30-dar shamasynda Táýke han dańǵyly men Kenesary kóshesiniń qıylysyndaǵy baǵdarshamnyń tusynda bolǵan. Jol jıeginde turǵan týǵan aǵasy men qaryndasyn «Mersedes bents-230» markaly jeńil kólik qaǵyp ketken. Qatty soqqymen ekeýin de eki jaqqa ushyrǵan kólik, artynsha «Neksııa» mashınasyna soqtyǵysqan. Jeti jasar Dılfýza Narmetova sol jerde jan tásilim etti. Jaraqat alǵan aǵasy Qadyr Narmetov bolsa túrli dene jaraqattarymen qalalyq ortalyq aýrýhanaǵa tústi. Anyqtalǵandaı, rýlde bolǵan júrgizýshi Túrkistan stansasy ishki ister jelilik bólimi patrýldik polıtsııasynyń 24 jastaǵy qyzmetkeri Erkebulan Dármenov ekeni anyqtaldy. 
«Sol kúni Túrkistan qalalyq ІІB-men Qylmystyq kodekstiń 345-baby 3-shi bóligimen qylmystyq is qozǵalyp, sotqa deıingi tergeý amaldary bastaldy. Al, sol kúni keshkisin QR Qylmystyq-protsestik kodeksiniń 131-babyna sáıkes, júrgizýshi Dármenov ustalyp, ýaqytsha ustaý ızolıatoryna jabyldy. Qazirgi tańda oǵan qatysty sotqa deıingi tergep-tekserý sharalary júrgizilýde»,-dep atap ótti Túrkistan qalalyq prokýrorynyń orynbasary Baqytjan Tóleev.
