Túrkistanda Pedagog mártebesi týraly zańdy buzǵan 4 mekteptiń dırektory jaýapqa tartyldy
TÚRKІSTAN. QazAqparat – Túrkistan oblysynda «Pedagog mártebesi týraly» zańdy buzǵan 4 mekteptiń basshysyna shara qoldanyldy. Bul týraly Túrkistan oblysynyń bilim salasynda sapany qamtamasyz etý departamentiniń basshysy Ǵalymjan Almatov aıtyp ótti, dep habarlaıdy QazAqparat tilshisi.
Departamentke áleýmettik jeliler men e-Ótinish portaly arqyly 4 shaǵym túsken. Aryz ıeleri kásiptik mindetterimen baılanysty emes jumys túrlerine tartylǵandary týraly shaǵymdanǵan. ıAǵnı, mektep basshylary pedagogterden ótkizilgen sabaqtar boıynsha esepter berýdi, merzimdik basylymdarǵa jazylýdy, mekteptiń jóndeý jumystaryna qarajat jınaýdy talap etken.
Máselen, Saýran aýdany Eski Ikan jalpy orta mektebiniń dırektory B.Nýrmetov mektep pedagogterinen kásipodaq tóraǵasynyń usynysymen qarjy jınap, synyp bólmeleriniń taqtalaryn aýystyrǵan. Bul baǵytta departament ákimshilik is qozǵap, Ákimshilik quqyq buzýshylyq Kodeksiniń 409-baby 7-3 bóligi boıynsha «eskertý» jasaǵan.
Al, Arys aýdanynda ornalasqan B.Ońtaev mektebiniń dırektoryna pedagogıkalyq ádep normalaryn buzý faktisi boıynsha ákimshilik is qozǵalyp, Ákimshilik quqyq buzýshylyq kodeksiniń 409-baby 7-6 bóligi boıynsha 30 AÁK kóleminde aıyppul salynǵan.
Al, Tólebı aýdany «Uıymshyl» mektebiniń dırektory T.Baıdıbekovtyń ádep normalaryn buzýy boıynsha isi departamenttiń pedagogıkalyq ádep jónindegi keńesinde qaralǵan.
«Pedagog mártebesi týraly» zań talaptaryn saqtamaý jaǵdaıy Shardara aýdanynda da oryn alǵan. «Dostyq» mektebi dırektorynyń mindetin atqarýshy P.Ahmetovaǵa Ákimshilik quqyq buzýshylyq kodeksiniń 409-baby 7-3 bóligi boıynsha «eskertý» berilgen.
