Túrkistanda páter urylary 1,5 mln teńgeden astam shyǵyn keltirgen
TÚRKІSTAN. QazAqparat – Túrkistanda birneshe páter urlyǵyn jasaǵan kúdiktiler ustaldy. Jábirlenýshilerge keltirilgen shyǵynnyń jalpy kólemi 1,5 mıllıon teńgeden asady, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, túrkistandyq turǵyn polıtsııaǵa páterin tonap ketkendigi týraly aryzdandaǵan. Ol kúndiz úıine belgisiz bireýler tereze arqyly kirip, aqsha men altyn buıymdaryn urlaǵanyn jetkizgen. Qylmysty ashý maqsatynda tájirıbeli polıtsııa qyzmetkerlerinen jedel-tergeý toby qurylyp, izdestirý sharalaryn júrgizgen. Nátıjesinde eki kúdikti ustalǵan. Onyń bireýi buryn sotty bolǵany anyqtaldy. Tergeý barysynda ustalǵandardyń osyndaı 6 páter urlyǵyn jasap, jábirlenýshilerge birneshe mıllıon teńge kóleminde shyǵyn keltirgeni anyqtaldy. Qaraqshylar aldymen, úılerdiń esigin qaǵyp nemese terezelerinen ishinde eshkim joq ekenine kóz jetkizip turǵan. Qoldy etken baǵaly zattar men altyn buıymdardy satyp otyrǵan, aqshany óz qajettilikterine jumsaǵan.
«Qazirgi ýaqytta atalǵan jaıttar boıynsha sotqa deıingi tergeý amaldary júrgizilip, kúdiktiler qamaýǵa alyndy. Polıtsııa qyzmetkerleri ustalǵandardyń Túrkistan qalasynyń aýmaǵynda osyndaı basqa da qylmystarǵa qatystylyǵyn anyqtaýda. Jábirlenýshilerge keltirilgen shyǵynnyń jalpy kólemi 1,5 mıllıon teńgeden asqan. Atalǵan jaıt QR QK-niń 188-babynyń 3-bóligi «Urlyq« boıynsha SDTTBT-ǵa tirkeldi», - delingen habarlamada.
