Túrkistanda «Parasatty polıtseı - 2019» baıqaýy ótti
Túrkistan oblysy Polıtsııa departamentiniń uıymdastyrýymen ótken baıqaýǵa Polıtsııa departamentine qarasty qala-aýdan polıtsııa basqarma bólimderinen barlyǵy 13 komanda qatysty. Túrkistan oblysy Polıtsııa departamentiniń baspasóz qyzmetiniń basshysy, polıtsııa polkovnıgi Saltanat Qarakózova saıysqa qatysýshylardy quttyqtap, baıqaýdyń maqsatyna keń kólemdi toqtalyp ótti.
«Bul baıqaýdyń negizgi maqsaty - QR Tuńǵysh Prezıdenti N.Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasyn iske asyrý, «Jastar jylyn» qoldaýǵa baılanysty, jas jáne bilikti polıtseılerdi tanytý, polıtsııa mamandyǵynyń deńgeıin ósirip, oń ımıdj qalyptastyrý. Sonymen qatar, eń mańyzdysy memlekettik tilimiz «qazaq tiliniń» mártebesin nyǵaıtý», - dedi ol.
Baıqaýǵa qatysýshy polıtseıler jınalǵan qaýymǵa jan-jaqty, segiz qyrly bir syrly ekendigin tanytyp, óz ónerlerin, bilim-biliktiligin kórsetti. Sondaı-aq, polıtseıdiń de án shyrqap, bı bılep, ázil aıtatyny, shyǵarmashylyqqa jaqyndyǵy jınalǵan jurtty súısindirdi.
«Parasatty polıtseı» baıqaýynyń qorytyndysynda ádil qazylar alqasynyń sheshimimen Bas júlde alǵan - Tólebı aýdanynan kelgen «Tólebı qyrandary» komandasy úzdik dep tanyldy. Birinshi oryndy - Arystyq «Arys aıbyny» qanjyǵasyna baılasa, ekinshi oryndy - Jetisaı APB-niń «Qyran» toby men Shardaralyq «Shardara - Shaǵala» komandalary ózara bólisti. Al úshinshi oryn - Saryaǵashtyq «Saryaǵash qyrandary» jáne Ordabasy APB-niń «Ordabasy qyrandary» komandalaryna buıyrdy. Buǵan qosa, 6 nomınatsııa boıynsha ózge de komandalar jeńimpaz bolyp tanyldy.
Jalpy júldeli oryndar men nomınatsııalarǵa ıe bolǵan komandalarǵa baǵaly syılyqtar men dıplom, alǵyshattar tabys etildi. Túrkistan oblystyq polıtsııa departamentiniń «Parasatty polıtseı - 2019» baıqaýynda jeńimpaz dep tanylǵan «Tólebı qyrandary» komandasy respýblıkalyq baıqaýǵa joldama enshiledi.
