Túrkistanda «Para berme» aktsııasy bastaldy

TÚRKІSTAN. QazAqparat - Sybaılas jemqorlyq kórinisteriniń aldyn alý maqsatynda oblys kóleminde 505 myńnan astam adamdy qamtyǵan 2 537 is-shara uıymdastyryldy. Sonyń ishinde 529-y – túsindirý jumystary, 1908-i – bilim berý uıymdaryndaǵy biryńǵaı saǵattar, dep habarlaıdy QazAqparat Óńirlik kommýnıkatsııalar qyzmetine silteme jasap.

Búginde oblys boıynsha kórsetilgen memlekettik qyzmetterdiń elektrondy túrdegi úlesi 88%-dy qurap otyr. Alaıda, ótkizilip jatqan sharalarǵa qaramastan, azamattar arasynda para usyný derekteri áli de kezdesýde. Máselen, 2019 jyldyń 9 aıynda laýazymdy tulǵalarǵa para berý faktisi boıynsha 7 qylmystyq is tirkelip, onyń 5-i sotqa joldanǵan. Atalǵan qylmystyq ister boıynsha búgingi kúni sot úkimimen 3 tulǵaǵa qatysty aıyptaý jazalary qoldanyldy. Bul týraly baspasóz ókilderine bergen brıfıngte QR Sybaılas jemqorlyqqa qarsy is-qımyl agenttiginiń Túrkistan oblysy boıynsha Departamenti basshysynyń birinshi orynbasary Ǵanıjan Asanuly málimdedi.

«Jeke tulǵalardyń zańsyz materıaldyq syıaqy berýi Qylmystyq kodekske sáıkes, 3 jylǵa deıingi merzimge bas bostandyǵynan aıyrý jazasy qoldanylady. Sondaı-aq, jemqorlyq faktileri týraly 1424 koll ortalyqqa habarlaýǵa bolady. Memlekettik mekemeden qyzmet alǵany úshin, qyzmetshige para bermeý kerektigin árbir azamat ózi sheshý kerek. Al, qyzmet berýshi qyzmeti úshin para talap etse, ol jaǵdaıda Agenttiktiń 1424 koll ortalyǵyna habarlaý kerek. Halyq zańdy aınalyp ótip, ońaı jol izdep, qyzmetshige para usynbaý kerek», – dedi Ǵ.

Asanuly. Budan basqa, para alý derekteri tek halyqtyń para usynýy arqyly iske asyrylatynyn jetkizip, sybaılas jemqorlyq deńgeıin tómendetý – tikeleı azamattardyń ózine baılanysty ekendigin jetkizdi. Sonymen qatar, búgingi kúni júıeli túrde Departament tarapynan oblysta ornalasqan memlekettik mekemelerde túsindirý jumystary, sybaılas jemqorlyq táýekelderine syrtqy taldaý jáne tekserý jumystary júrgizilýde. Osy oraıda keıbir azamattar Departament qyzmetkerlerine beremiz degen syltaýmen mekeme qyzmetkerlerinen aqsha jınaıtyndyǵyna toqtalyp ótti. Sondaı-aq, brıfıng barysynda oblystaǵy barlyq memlekettik organdar qamtylǵan #Para berme» chelendjiniń kıeli óńirde bastaý alǵandyǵyna aıtyp, buǵan barsha azamattardy belsendi túrde qatysýǵa shaqyrdy.