Túrkistanda pandemııaǵa qarsy qor muqtaj otbasylarǵa kómektesedi
TÚRKІSTAN. QazAqparat - Búgin oblys ákimdigi men «Nur Otan» partııasy Túrkistan oblystyq fılıalynyń basshylyǵy óńirdegi kásipkerler men jaýapty basqarma basshylaryn jınap, keńes ótkizdi. Túrkistan oblysy ákimi, partııa fılıalynyń tóraǵasy Ómirzaq Shókeevtiń qadaǵalaýymen koronavırýske qarsy kúreske baǵyttalǵan is-sharalary barynsha kúsheıtiletin bolady, dep habarlaıdy QazAqparat.
Óńirde Elbasynyń «Biz birgemiz» aktsııasyn joǵarǵy deńgeıde júrgizip, óńirdegi turmysy tómen otbasylarǵa kómektesý qolǵa alynady. Ol úshin muqtaj otbasylarǵa arnalǵan qaıyrymdylyq qor retinde «Túrkistan korporatıvtik áleýmettik damý qory» tańdalyp alyndy. Elbasynyń tapsyrmasyna oraı, atalǵan qorǵa oblys ákimdigi, basqarmalar men oǵan qarasty mekemeler birkúndik jalaqylaryn aýdarady. Óńirdegi kásipkerler de atalǵan qorǵa demeýshilik kórsetedi. Sondaı-aq, ózge azamattar da banktik rekvızıtter boıynsha óz qoldaýyn kórsete alady.
Sonymen qatar, «Túrkistan» korporatıvtik áleýmettik damý qorynyń« janynan qamqorshylyq keńesi quryldy. Qamqorshylyq keńesiniń quramyna «Nur Otan» partııasy, Atameken kásipkerler palatasy, depýtattar, ardagerler keńesiniń ókilderi kirdi.
«Nur Otan» partııasy Túrkistan oblystyq fılıaly men oblystyq jumyspen qamtýdy úılestirý jáne áleýmettik baǵdarlamalar basqarmasy birlesip, óńirdegi kómekke muqtaj 1300-ge jýyq azamattyń tizimin jasaqtady. Bul otbasylarǵa antıseptıkalyq quraldar, medıtsınalyq maskalar jáne birinshi kezekte qajetti basqa da ónimder, azyq-túlik tapsyrylady. Atap aıtqanda, ár adamǵa ylǵaldy maılyqtar, antıseptık, medıtsınalyq betperde, qaǵaz maılyq, 5 keliden makaron, qaraqumyq, kúrish, qant jáne ósimdik maıy taratylmaq. Qara shaı, tuz, kúlshe de sebetke engizilgen.
Aıta keterligi, Túrkistan oblysy aýmaǵynda 4 blokpost ornatylǵan. Óńirde barlyq mekemeler men qoǵamdyq oryndarda dezınfektsııa jumystary júrýde.
