Túrkistanda patsıentter medbıkelerdi tól merekesimen quttyqtady
TÚRKІSTAN. QazAqparat – Túrkistanda naýqastar rııasyz qurmetke laıyq jandar - medbıkelerdi tól merekesimen quttyqtady. Aıtýly kúni 25 jyldan astam jumys ótili bar 120 orta býyn qyzmetkerine qurmet gramotasy tabystaldy, dep habarlaıdy QazAqparat tilshisi.
12 mamyr - Halyqaralyq meıirbıkeler kúni ekeninen qaramastan óńirdegi aq jelekti abzal jandar karantın rejıminde jumys isteýde.
Máselen, Jetisaı aýdandyq ortalyq aýrýhanasynyń medbıkesi Baıansulý Maılybaeva otbasyn kórmegeli bir aıdyń júzi bolǵan. 30 jylyn medıtsına salasyna arnaǵan maman ınfektsııalyq gospıtalde táýlik boıy koronavırýske shaldyqqan naýqastardy emdeýde. Qaýipti indetpen kúresip júrip, merekeni umytyp ketkenin de jasyrmaıdy.
Aıtýynsha, bir naýqastyń bolsa da aýrýyn jeńýge úlesi tıse, budan asqan oǵan marapat joq. Al, oblystyq qoǵamdyq densaýlyq basqarmasynyń basshysy Marat Pashımov ár medbıkege quttyqtaý tilegin jetkizdi.
«Sizder kúni-túni naýqastardyń janynda júrip, aýrýmen kúreste olardyń árbir jeńisi men jeńilisine kýásizder. Emdelýshilermen birge kúızelip, birge qýanasyzdar. Qyzmetterińiz aýyr ári óte jaýapty. Merekelik is-sharanyń reti kelmegenimen sizderge quttyqtaý tilegimdi joldaımyn. Halyq ıgiligi jolynda jasap jatqan eńbekterińizge sáttilik pen abyroı, denderińizge saýlyq, otbasylaryńyzǵa amandyq tileımin» delingen quttyqtaý hatta.
Aıta keteıik, búginde óńirde 18 myńnan astam orta býyn medıtsına qyzmetkeri bar. Onyń 10 myńǵa jýyǵy aýyl halqynyń densaýlyǵyna jaýapty. Emdeý sharalarynyń eleýli úlesi dál osy mamandardyń enshisinde.
