Túrkistanda ózbek fılmderiniń kúnderi ótti

Jıynda Túrkistan oblysy ákiminiń orynbasary Málik Otarbaev quttyqtaý sóz sóılep, osyndaı is-sharalar arqyly baýyrlas elderdiń rýhanı-mádenı baılanystary nyǵaıa túsetinin jetkizdi. Sonymen birge, Ózbekstan Respýblıkasynyń Qazaqstan Respýblıkasyndaǵy Bas konsýldyǵynyń Bas konsýly Abrar Fathýllaev pen Qazaqstan ózbekteri «Dýstlık» qaýymdastyǵynyń tóraǵasy Ikram Hashımjanov ta Túrkistannyń túrlenip kele jatqanyna qýanyshty ekenderin atap ótti.

Ózbekstandyq rejısserler kórsetilim barysynda Shyńǵys Aıtmatovtyń qıssasy aıasynda túsirilgen «Sarvkomat Dılbarım» kórkem fılmin jurtshylyq nazaryna usyndy. Sondaı-aq, qazaqtyń uly aqyny Abaıdyń balalyq shaǵy, qorshaǵan ortasy, shyǵarmashylyǵy jóninde muraǵat qujattarymen órilgen «Slovo Abaıa» derekti fılmi de túrkistandyqtarǵa kórsetildi. Bul týyndynyń rejısseri - Shýhrat Mahmýdov. «O'zbekfilm» kınostýdııasy túsirgen «Oıkız» ertegisi de kórermenderdiń oń baǵasyn aldy.

Aıta keteıik, ótken 2018 jyl Qazaqstanda Ózbekstan jyly dep atalyp ótkeni belgili. Osy bastamalar aıasynda baýyrlas halyqtardyń jaqyndastyǵyn tereńdetýge septigin tıgizetin túrli is-sharalar uıymdastyrylǵan bolatyn. Sonyń jalǵasy retinde Túrkistanda uıymdastyrylǵan mádenı basqosýǵa kórermender qyzyǵýshylyǵy joǵary boldy.