Túrkistanda óz kásibin ashqandar kóbeıip keledi
TÚRKІSTAN. QazAqparat - Túrkistan oblysynda jergilikti ákimdik pen qarjy uıymdary tarapynan shaǵyn jáne orta kásipkerlikti damytýǵa qoldaý kórsetilýde. Osy memlekettik qoldaýlar nátıjesinde óńirde kásipkerlikke bet burǵandar sany artyp keledi, dep habarlaıdy QazAqparat tilshisi.
Túrkistan oblysynda shaǵyn jáne orta bıznesti damytý baǵytynda qurylǵan «Yrys» mıkroqarjy uıymy jyl basynan beri 4 387,7 mln teńgeni quraıtyn 1 228 jobany qarjylandyrdy. Júzege asqan jobalar boıynsha 1 300-den astam jańa jumys orny ashyldy. Qarjylandyrylǵan jobalardyń 31,9 paıyzy mal sharýashylyǵyn damytýǵa baǵyttalǵan.
Naqtyraq aıtsaq, 371 jobaǵa nesıe bólgen. Al, kóktemgi egistik jumystary boıynsha 766 joba, jylyjaı sharýashylyǵy boıynsha 15 jobaǵa qoldaý kórsetilgen. Óndiris, qus sharýashylyǵy, qyzmet kórsetý jáne ózge de salalarǵa qarjylaı qoldaý jasaldy.
Máselen Túrkistan qalasynyń turǵyny Turǵanbaı Ahmetov «Yrys» mıkroqarjy uıymynan «Nátıjeli jumyspen qamtý jáne jappaı kásipkerlikti damytý» baǵdarlamasy aıasynda 10 mln teńge jeńildetilgen nesıe alǵan. Osy qarjyǵa birneshe qurylǵy satyp alyp, «Datqa» dep atalatyn jeke kásiporyn ashqan. Qazirgi tańda kásipker turmystyq qatty qaldyqtardy óńdep, polıetılen jáne plastık qubyrǵa qajetti shıkizat óndirýde. Osy kásibi arqyly ol 11 adamdy jumyspen qamtyp otyr. Endi karton qaǵazdaryn óńdeýdi qolǵa almaqshy.
Oblys ortalyǵynyń taǵy bir turǵyny Jandar Islambek «Yrys» mıkroqarjy uıymynyń «Jas kásipker» baǵdarlamasy boıynsha 2 mln teńge nesıe alǵan. Búginde jas kásipker avtokólik maı súzgileriniń 286 túrin óndirýde. Osy kásibi arqyly 8 adamdy jumyspen qamtyp, aıyna 20 myń dana súzgi shyǵarýda. Bul súzgiler Túrkistan oblysy men Shymkent qalasyna satylýda.
Aıta keteıik, «Yrys» mıkroqarjy uıymy ashylǵan sátten bastap 17 367 jobany qoldap, 16 myńnan astam jańa jumys orynyn ashylýyna yqpal etti. «Jas kásipker» baǵdarlamasy aıasynda 18 ben 29 jas aralyǵyndaǵy isker jastarǵa 20 mln teńge nesıe berilgen. Sonymen birge, «Yrys» mıkroqarjy uıymy fermerlerge aldyn-ala tólemsiz qarjy lızıngin berip, «Yrys-Órkendeý» dep baǵdarlamasy boıynsha kásipkerlerge aýyl sharýashylyq tehnıkasyn satyp alýǵa qoldaý kórsetýde. 
