Túrkistanda oınap júrip adasyp ketken apaly-inili búldirshinder tabyldy
TÚRKІSTAN. QazAqparat - Túrkistan oblysynyń polıtseıleri úıinen shyǵyp, 15 shaqyrym jerge deıin adasyp ketken qos búldirshindi tapty, dep habarlaıdy QazAqparat.
Túrkistanda polıtsııa qyzmetkeri, polıtsııa kapıtany Marat Sultanhanuly Omarov óz mindetin atqarý kezinde, jol boıynda adasyp, jylap turǵan qos búldirshindi baıqaıdy.
Tártip saqshysy nebary 7 jáne 3 jasar balalardyń janyna kelip, olardan turǵylyqty mekenjaılary men qandaı da bir málimet bilýge tyrysady.
Biraq jylaǵannan sharshaǵan balalar úreılenip, naqty málimet bere almaıdy.
Balalardyń adasyp ketkenin túsingen tártip saqshysy olardy Túrkistan qalalyq polıtsııa basqarmasyna jetkizedi.
Ol jerde tamaqtandyryp, arnaıy psıholog mamandarymen birge áńgimege tartyp, jubatady.
Osydan soń barsha jergilikti polıtsııa qyzmetiniń polıtseılerine habar berilip, búldirshinderdiń sýreti joldanyp, ata-anasyn izdestire bastaıdy.
Osylaısha birneshe saǵattyń ishinde balalardyń jaqyndary anyqtaldy. Olar polıtsııaǵa aryzdanbastan, óz betinshe 7 jasar qyzy men 3 jasar ulyn izdep júrgen eken.
Belgili bolǵandaı, qos búldirshin oınap júrip, adasyp, úıinen 15 shaqyrym jerge deıin alystap ketken.
Polıtseıler olar izdep júrgen qos búldirshin tabylǵanyn aıtqanda, anasy qýanyp, polıtsııa qyzmetkerlerine rızashylyǵyn jetkizdi.
«Ulym men qyzym úıden shyǵyp ketip, joǵalyp qalǵan edi. Túrkistan qalalyq polıtsııa qyzmetkerlerine kóp-kóp raqmet. Alla razy bolsyn, óz jumysyna adal jandar», -dep júrekjardy sózin arnady.
Túrkistan oblysynyń polıtseıleri barsha azamattarǵa balalarǵa abaı bolyp, syrtqa oınaýǵa shyqqanda qaraýsyz qaldyrmaý kerektigin eskertedi.
