Túrkistanda ótken «Mýzeıge syı» aktsııasynda turǵyndardan 40-qa tarta jádiger tartý etildi

TÚRKІSTAN. QazAqparat – Túrkistan qalasyndaǵy «Áziret Sultan» memlekettik tarıhı–mádenı qoryq–mýzeıiniń uıymdastyrýymen dástúrli «Mýzeıge syı» aktsııasy ótti. Shara aıasynda jergilikti turǵyndar men qonaqtardan qoryq-mýzeı qoryna 40-qa jýyq arheologııalyq, etnografııalyq, nýmızmatıkalyq jádigerler tabystaldy, dep habarlaıdy QazAqparat tilshisi.

Jádigerlerdiń qatarynda jańa tas dáýirine tán jebeniń ushy (shamamen b.z.d. 5-3 myńjyldyqtar), jazba eskertkishter men qumyra jáne túrli qysh buıymdar bar. Sondaı-aq, Úkasha ata kesenesin qaıta jańartý úshin kóp eńbek sińirgen Atajan molda men Kámil qarynyń kıgen kıimderi, jaınamazdary, qoldanǵan turmystyq zattary, túrkistandyq qolóner sheberleriniń toqyma kilemderi men syrmaqtary syndy kóptegen kóne jádigerler tartý etildi. Atalǵan is-sharaǵa Qazaqstannan ǵana emes Túrkııa, Ózbekstan Respýblıkalary da atsalysyp, qundy jádigerler tabystaýdy dástúrge aınaldyrǵan. Aıta keteıik, «Mýzeıge syı» aktsııasy «Áziret Sultan» qoryq mýzeıinde jyl saıyn ótkizilip kele jatqan aýqymdy is-sharalardyń biri sanalady. Elbasy N.Á.Nazarbaevtyń «Bolashaqqa baǵdar: rýhanı jańǵyrý» jáne «Uly dalanyń jeti qyry» baǵdarlamalyq maqalalarynda ulttyq qundylyqtar men tarıhı muralarymyzdy keńinen nasıhattaýǵa arnalǵan tyń jobalar usynǵany belgili. Mýzeıge syı jasaý úrdisi ataqty Ámir Temirden bastaý alsa, kóne muralardy jınaqtap, saqtaý, qorǵaýda belgili etnograf-ǵalym, qoǵam qaıratkeri Ózbekáli Jánibekovtiń de eńbegi zor sanalady. Sondaı-aq, ulaǵatty ustaz Adasqan Altaev, Qazaq SSR halyq sýretshisi Sahı Romanov, Ahmadýlla Isaev, Aman Abdýllaev, A.Hamrakýlov syndy mýzeı janashyrlaryn da atap ótpeý múmkin emes. «Tehnologııanyń qaryshtap damyǵan zamanynda kóne zattardyń kúndelikti turmysqa qajetsiz bolǵanymen, halqymyzdyń ótken ómiri men tarıhyn zertteýde, bolashaq urpaqtyń óz tarıhy men bolmysyn tanýda mańyzy zor. Qyryq bir jyl buryn 300-deı ǵana jádigeri bar «Áziret Sultan» qoryq-mýzeıinde qazirgi kúni 24 481 danasy memlekettik tirkeýge alyndy. Búgingi sharaǵa da óz úlesin qosýǵa kelgen barsha mýzeı janashyrlaryna alǵysymdy bildiremin»,- dedi «Áziret Sultan» memlekettik tarıhı-mádenı qoryq-mýzeıiniń dırektory Nurbolat Qadyruly.

Aıta keteıik, «Áziret Sultan» qoryq - mýzeıindegi qordy tolyqtyrý maqsatynda ótkiziletin «Mýzeıge syı» aktsııasynda jádigerler eki baǵytta qabyldanady. Qundy dúnıeler negizgi qor esebine qabyldansa, ekspozıtsııa jáne kórme qurýǵa kómekshi qural retinde paıdalanatyn jádigerler ǵylymı kómekshi qorǵa tirkeledi. Qazirgi kúni 24 481 dana jádiger memlekettik tirkeýge alynsa, onyń ishinde syıǵa berilgen jádigerler sany 1780 danany quraıdy. Sońǵy úsh jylda qabyldanǵan 741 jádigerdiń 268-i syıǵa berilgen muralar bolyp tabylady.