Túrkistanda ótken marafonǵa 19 memleketten 5000-ǵa jýyq sportshy qatysty
TÚRKІSTAN. QazAqparat - Qazaqstan Respýblıkasy Táýelsizdiginiń 30 jyldyǵyna jáne «Túrkistan – túrki elderiniń rýhanı astanasy» atalýyna oraı «Turkistan International Marathon» halyqaralyq marafony uıymdastyryldy,-dep habarlaıdy QazAqparat tilshisi.
Іs-sharanyń saltanatty ashylýyna qatysqan Túrkistan qalasynyń ákimi Nurbol Turashbekov damýshy memlekette salaýatty ómir saltyn qalyptastyrý, deni saý urpaq ósirý mindeti qaı kezde de basymdyqqa ıe ekenin atap ótip, qatysýshylarǵa sáttilik tiledi.
Marafonshylar 3, 10, 21, 42 shaqyrym qashyqtyqtarda júgirdi. Kerýen Saraı kesheni aldynan bastaý alyp B.Sattarhanov dańǵylynyń boıymen Shymkent baǵytyna qaraı J.Maıkotov kóshesine deıingi aralyqty qamtydy.
Sharaǵa 19 memleketten 5000-ǵa jýyq sportshy qatysty. Onyń 3000 sportshysy onlaın júıede óz memleketterinde júgirip, marafonǵa úles qosty.
Júldegerler aqshalaı syılyqtarǵa ıe boldy.
