Túrkistanda ótken alaman aıtysta Bekarys Shoıbekov birinshi oryndy jeńip aldy
Qazaqstan Respýblıkasy Mádenıet jáne sport mınıstrligi mádenıet komıtetiniń qoldaýymen «Áziret Sultan» memlekettik tarıhı-mádenı mýzeı-qoryǵy uıymdastyrǵan aıtysqa «Altyn dombyra» ıegeri Bekarys Shoıbekov, aıtystyń aqtańgeri Erkebulan Qaınazarov jáne respýblıkaǵa tanymal Meıirbek Sultanhan, Birjan Baıtýov, Shuǵaıyp Sezimhan, Nurlybek Meıirmanov, Dáýren Aqsaqalov, Erjan Ámirov syndy aqyndar qatysty.
Óner saıysy túrki áleminiń kıesi men qasıetine aınalǵan Qoja Ahmet ıAsaýı jáne kesene men onyń aınalasynda jerlengen tulǵalardy dáripteý, Túrkistan jaıly taǵylymdy oı bólisý, halyqqa nasıhattaý maqsatynda uıymdastyrylǵan.
Aıtysty «Áziret Sultan» memlekettik tarıhı-mádenı mýzeı-qoryǵynyń dırektory Máýlen Sadyqbekov ashyp, aqyndarǵa sáttilik tiledi.
Ultymyzdyń ulylyǵy men qara sózdiń qasıetin shabytty shýmaqpen pash etip, aıtysqa sýsaǵan kórermenge eldik rýhty asqaqtatar oı salǵan aqyndar árlengen ázilmen de elge kóterińki kóńil-kúı syılady.
Qazylar alqasynyń sheshimimen birinshi orynǵa túrkistandyq aqyn Bekarys Shoıbekov laıyq dep tanylsa, Nur-Sultan qalasynan kelgen Erkebulan Qaınazarov ekinshi oryndy, qyzylordalyq Erjan Ámirov pen shymkenttik aqyn Nurlybek Meıirmanov úshinshi oryndy ıelendi.
Sondaı-aq, Qanybek Sarybaev atyndaǵy arnaıy júldemen qyzylordalyq Meıirbek Sultanhan, Ábdikerim Manapov atyndaǵy arnaıy júldemen Almaty oblysynan Shuǵaıyp Sezimhan, Kópbaı Omarov atyndaǵy arnaıy júldemen Birjan Baıtýov, Áselhan Qalybekova atyndaǵy arnaıy júldemen Túrkistan oblysynan Dáýren Aqsaqalov marapattaldy.
