Túrkistanda «Otandastar» forýmy ótedi

NUR-SULTAN. QazAqparat - «Otandastar» qorynyń prezıdenti Nurtaı Ábiqaev osy jyldyń kúzinde Túrkistanda «Otandastar» forýmyn ótkizý josparda bar ekenin málim etti, dep habarlaıdy QazAqparat tilshisi.

«Byltyr Qazaqstanda «Qasıetti Qazaq eli» atty óner festıvali ótkizilgen edi. Bıyl da ol sharany keń aýqymda uıymdastyratyn bolamyz. Sonymen birge, ústimizdegi jyly Túrkistanda «Otandastar» forýmyn ótkizýdi usynyp otyrmyz. «Kıeli Qazaqstan», «Jastar sleti» qatarly sharalar da bar. Sheteldegi qazaq áýenderiniń kontsertin de uıymdastyrsaq deımiz. «Otandastar» atty kitaphana ashý kózdelip otyr. Osyndaı birshama is-sharalar legin ótkizýdi qolǵa alyp jatyrmyz», - dedi Nurtaı Ábiqaev Mádenıet jáne sport mınıstri Arystanbek Muhamedıulymen memorandýmǵa qol qoıý kezinde.

Óz kezeginde Arystanbek Muhamedıuly búgingi memorandýmnyń mańyzy joǵary ekenin atap ótti.

«Elbasy tapsyrmasyna sáıkes, sheteldegi qandastarymyzǵa, otandastarymyzǵa jan-jaqty kómek kórsetý kerek. Árıne, shettegi qazaqtar úshin elimizdegi ádebıet, tarıhı málimetter qoljetimdi bolýy tıis. Osy maqsatta bizdiń mınıstrlik jyl saıyn shetelde júrgen qandastarymyzdyń shyǵarmalaryn, kitaptaryn Qazaqstan qarjysy esebinen elge taratyp otyrmyz. Sol sekildi sheteldegi qandastarymyz Qazaqstandaǵy iri festıvalder men konkýrstarǵa qatysa alatyndaı jaǵdaı jasap kelemiz», - dedi mınıstr.

Eske sala ketsek, búgin «Otandastar qory» KEAQ prezıdenti Nurtaı Ábiqaev pen QR Mádenıet jáne sport mınıstri Arystanbek Muhamedıuly sheteldegi qazaqtardy qoldaýǵa baǵyttalǵan memorandýmǵa qol qoıǵan bolatyn.