Túrkistanda Ortalyq saılaý komıssııasy tóraǵasynyń qatysýymen kóshpeli semınar-keńes ótti

TÚRKІSTAN. QazAqparat - Búgin Túrkistan qalasynda 19 naýryzǵa belgilengen QR Parlamenti Májilisi jáne barlyq deńgeıdegi máslıhat depýtattaryn kezekten tys saılaý máselesi boıynsha QR OSK músheleriniń qatysýymen kóshpeli semınar-keńes ótti. Atalǵan sharaǵa QR Ortalyq saılaý komıssııasynyń tóraǵasy Nurlan Ábdirov keldi, dep habarlaıdy QazAqparat.

Jıynǵa ASK músheleri, kandıdattardyń saılaýaldy shtabtarynyń ókilderi, BAQ ókilderi, elektoraldy jattyqtyrýshylar, múddeli memlekettik organ ókilderi, Eýropadaǵy qaýipsizdik jáne yntymaqtastyq uıymynyń ókilderi, «Daýys» qoǵamdyq baıqaýshylar koalıtsııasy» Respýblıkalyq qoǵamdyq birlestiginiń Túrkistan oblysy fılıalynyń tóraǵasy qatysty.

Semınar-keńeske Qazaqstan Respýblıkasy Ortalyq saılaý komıssııasynyń hatshysy Erman Muhtar moderator boldy.

QR Ortalyq saılaý komıssııasynyń tóraǵasy N.Ábdirov saılaýǵa daıyndyq boıynsha baıandama jasady.

Túrkistan oblysy ákiminiń orynbasary Beısen Tájibaev oblysta saılaý naýqanyn ótkizý boıynsha júrgizilip jatqan jumysqa toqtaldy.

«Búgingi kúnge oblystaǵy 17 aýdan, qala boıynsha 1 mıllıon 168 myń 658 saılaýshy, 941 saılaý ýchaskesi bar. Daýys berý kúni saılaý ýchaskelerinde 6984 baıqaýshy jumys isteıdi dep josparlanyp otyr. Baıqaýshylar usynatyn 25 qoǵamdyq birlestik akkredıtteýden ótken»,- dep atap ótti Beısen Dáýletuly.

Odan keıin óńirlerdegi úgit-nasıhat jumystarynyń ótkizilý barysy, oryn alǵan zańbuzýshylyqtar boıynsha oblys prokýrorynyń mindetin atqarýshy Saıan Keldibekov, «Saılaý naýqany jáne daýys berý kúni quqyqtyq tártipti qamtamasyz etý» máseleleri boıynsha Túrkistan oblysynyń polıtsııa departamenti bastyǵynyń birinshi orynbasary Baǵlanbek Aıtpaev baıandama jasady.

Aıta keteıik, Túrkistan oblysy ákimdiginiń, 17 qala men aýdan ákimdiginiń ınternet-resýrstarynda «Óz saılaý ýchaskeńdi tap» izdeý qyzmeti, sondaı-aq, saılaýshylardy izdeýge arnalǵan telegram bot (@tur_saylaw_bot) jumys isteıdi.

Saılaý ýchaskeleri pandýstarmen, qosymsha jaraqtandyrý jáne taktıldi belgilermen qamtylǵan.

Saılaý kúni múgedektigi bar adamdarǵa oblys kóleminde 43 ınvataksı jáne 50 áleýmettik taksı qyzmet kórsetedi.

Qosymsha qajettilik bolǵan jaǵdaıda saılaý ýchaskelerinde demeýshiler esebinen 60 kólik uıymdastyrylyp, estý qabileti nashar azamattar úshin saılaý ýchaskesine 114 ymdaý tili mamanynyń qyzmeti kórsetiledi.