Túrkistanda ornalasatyn «TURAN» arnaıy ekonomıkalyq aımaǵy 10 jylda qurylady
«2043 jylǵa deıingi kezeńge «TURAN» arnaıy ekonomıkalyq aımaǵy (AEA) qurylsyn. «TURAN» arnaıy ekonomıkalyq aımaǵy Túrkistan oblysynyń aýmaqtyq shekarasy sheginde, qosa berilip otyrǵan josparǵa sáıkes shekaralarda ornalasqan. AEA aýmaǵy Qazaqstan Respýblıkasy aýmaǵynyń ajyramas bóligi bolyp tabylady jáne 4622,39 gektardy quraıdy. AEA aýmaǵynyń quramyna 6 sýbaımaq: 861,75 gektar tarıhı ortalyq, 1578,64 gektar ákimshilik iskerlik ortalyq, aýmaǵy 1000 gektar, 35 gektar jáne 180 gektar ónerkásiptik aımaqtar jáne 967 gektar áýejaı kiredi», - dep jazylǵan Ashyq NQA portalynda jarııalanǵan Úkimet qaýlysynyń jobasynda.
Aıta keteıik, atalǵan aımaqty qurý týraly sheshim qabyldanǵan ýaqytta onyń jobalyq aýmaǵy 3987,39 gektar bolyp bekitilgen. Endi ol 4622,39 gektarǵa deıin ulǵaıtylmaq.
Sonymen qatar arnaıy ekonomıkalyq aımaq qyzmetiniń basym baǵyttaryna da ózgeris engizildi. Endi aýmaqta myna jumystar atqarylady:
- týrısterdi ornalastyrý oryndaryn, sanatorıı jáne saýyqtyrý obektilerin mynadaı sharttardy saqtaı otyryp salý jáne paıdalanýǵa berý: salynyp jatqan jáne paıdalanýǵa beriletin obektilerdiń oıyn bıznesimen baılanysty emes, salý jáne paıdalanýǵa berý jobalaý-smetalyq qujattamaǵa sáıkes júzege asyrylady;
- jobalaý-smetalyq qujattamaǵa sáıkes, ınfraqurylym obektilerin, ákimshilik jáne turǵyn úı keshenderin salý jáne paıdalanýǵa berý;
- jobalaý-smetalyq qujattamaǵa sáıkes, aýrýhanalardy, emhanalardy, mektepterdi, balabaqshalardy, mýzeılerdi, teatrlardy, joǵary jáne orta oqý oryndaryn, kitaphanalardy, oqýshylar saraılaryn, sport keshenderin salý jáne paıdalanýǵa berý;
- jobalaý-smetalyq qujattamaǵa sáıkes óndiristik jáne qaıta óńdeý obektilerin salý jáne paıdalanýǵa berý;
- qurylys materıaldaryn óndirý;
- ózge metall emes mıneraldy ónimderdi óndirý;
- daıyn metall buıymdaryn jasaý;
- jıhaz ben ınterer buıymdaryn jóndeý;
- elektrondyq jáne optıkalyq jabdyqty jóndeý.
Qaýly-jobasy 6 qyrkúıekke deıin kópshilik talqylaýda bolady.
