Túrkistanda or qazyp qorshalǵan jer telimderi májbúrlep memleketke qaıtarylmaq

TÚRKІSTAN. QazAqparat - Túrkistan oblysynda jer teliminiń shekarasyn zańsyz or qazyp qorshaǵan jalpy aýmaǵy 41 876,5 gektar 139 jer telimi anyqtaldy. Bul týraly QazAqparat ákimdikke silteme jasap habarlaıdy.

Atalǵan jer paıdalanýshylar QR Jer kodeksiniń 140 babynyń talaptaryn buzyp, ıaǵnı jerdi zańsyz búldirip, jerdiń qunarly qabatyn buzyp, sydyryp alyp qorshaǵan ortaǵa zııan keltirýde. Olarǵa QR Ákimshilik quqyq buzýshylyq kodeksiniń 337-babyna sáıkes, qorshaǵan ortaǵa keltirgen zııan somasy mólsherinde aıyppul salynyp, jerleri sot arqyly májbúrlep memleketke qaıtarylady. Bul týraly búgin Báıdibek aýdanyndaǵy press-týr aıasynda Túrkistan oblysynyń jer ınspektsııasy basqarma basshysynyń mindetin atqarýshy Altynbek Myrzaev aıtty.

Sonymen qatar, QR Ekologııalyq kodekstiń 5-babynyń 7-tarmaǵy, 95-babynyń 7 tarmaǵy jáne 108-babynyń 2-tarmaǵyna sáıkes, qorshaǵan ortany qorǵaý salasyndaǵy ýákiletti organnyń laýazymdy adamdary qorshaǵan ortaǵa zalal keltirý faktisin anyqtap, qajetti materıaldardy jınaý men taldaýdy júrgizedi. Sondaı-aq, keltirilgen zalalǵa ekonomıkalyq baǵalaýdy belgileıdi jáne 117-baptyń 8-tarmaǵyna sáıkes, tulǵalardy ákimshilik nemese qylmystyq jaýapqa tartý týraly materıaldardy tıisti organdarǵa joldaıdy.

Qorshaǵan ortaǵa keltirilgen shyǵyn qunynyń mólsherine baılanysty Qylmystyq kodekstiń 333-babyna sáıkes, qylmystyq jaýapkershilike tartylý kózdelgen. Sonymen qatar, zańsyz jer paıdalanýshylarmen qazylǵan jerlerdi qalpyna keltirý úshin rekýltıvatsııa júrgiziletin bolady.

Eske salsaq, buǵan deıin ekologtar Qazaqstannyń ońtústigindegi transheıalarda jabaıy ańdar qyrylyp jatqany týraly aıtyp, dabyl qaqqan bolatyn.