Túrkistanda onkologııalyq aýrýlardyń aldyn alýǵa arnalǵan ortalyq ashyldy
TÚRKІSTAN. QazAqparat - Túrkistan oblysynda onkologııalyq aýrýlardyń aldyn alýǵa arnalǵan ortalyq ashyldy. Oblystyq klınıkalyq aýrýhanaǵa qarasty emhanada naýqastarǵa dıagnostıka jasalyp, medıtsınalyq ońaltýǵa baǵyttalǵan is-sharalar júrgiziledi, dep habarlaıdy QazAqparat tilshisi.
Jańadan jasaqtalyp qurylǵan emdeý mekemesi onkologııalyq aýrýlardan bolatyn ólim-jitimdi tómendetý men erte dıagnostıkany arttyrý maqsatynda ashylyp otyr. Sondaı-aq, onkologııalyq aýrýlarǵa skrınıng júrgizýdi jetildirý jolymen 5 jyldyq ómirsheńdikti arttyrý qolǵa alynbaq. Munda qaterli isikke shaldyqqan naýqastardyń yńǵaılylyǵy úshin barlyq jaǵdaı jasalǵan. Ortalyqta elektrondyq kezek kútý zaly men jeke tirkeý orny bar. Naqastardy túrli beıindegi joǵary sanatty onkolog dárigerler qabyldap, em-dom jasaı alady. Emdeý ornynda konsýltatsııalyq qabyldaýdan basqa ambýlatorııalyq jaǵdaıda hımııa, gormon jáne targettik terapııa júrgiziletin arnaıy bólmeler ashylǵan. Sondaı-aq mammologııalyq em qabyldaýǵa da barlyq jaǵdaı jasalǵan. Sút bezderiniń paıda bolýyn bıopsııanyń barlyq túrlerin meńgergen sáýleli dıagnostıkadaǵy jumys tájirıbesi mol bilikti mammolog maman qabyldaý júrgizedi. Al, dıagnostıkalyq bloktarǵa qatysty Oblystyq klınıkalyq aýrýhananyń emhanasy zamanaýı medıtsınalyq qural- jabdyqtarmen tolyq qamtylǵan. Bul der kezinde jáne dál dıagnostıkany júrgizýge múmkindik beredi.
«Munda jaqsy jabdyqtalǵan tsıtologııalyq jáne morfologııalyq, klınıkalyq jáne bıohımııalyq zerthanalar bar. Onkomarkerlerdi anyqtaýǵa arnalǵan medıtsınalyq jabdyqtar aýrýdyń dınamıkasyn baqylaýǵa, júrgizilgen emdeý áserin baǵalaýǵa múmkindik beredi»,- deıdi oblystyq Densaýlyq saqtaý basqarmasynyń basshysy Muqan Egizbaev.
