Túrkistanda óńesh qan tamyrlaryna alǵash ret operatsııanyń jańa túri jasaldy

Bilikti dárigerler eki kún boıy osyndaı operatsııany 6 naýqasqa jasap, óńeshtegi qan tamyrlarynyń jarylýynan qan ketý protsesiniń aldyn alǵan, dep habarlaıdy QazAqparat.

Sala mamandarynyń sózinshe, óńeshtegi asqynýlar negizinen baýyr tsırrozy kezinde jıi kezdesetin qaýip-qater sanalady. Medıtsınada búginde óńeshten qan ketýdiń aldyn alýda tıimdi em retinde endoskopııalyq operatsııa túri qoldanylyp júr. Reseıde jáne Ulttyq ǵylymı hırýrgııa ortalyǵynda biliktiligin arttyrǵan mamandardyń biri Túrkistan qalalyq aýrýhanasynyń endoskopıst-dárigeri Bekjan Asıbekov operatsııany jasaýǵa biraz ýaqyt daıyndyq júrgizilgenin aıtady.

«Joǵary bilikti endoskopıst-dárigerlermen tájirıbe almasýdyń arqasynda bundaı operatsııa túrin jasaýdy jetik meńgerdim. Aýrýhanamyzda zamanaýı medıtsınalyq qural-jabdyqtar da ornatyldy. Halyqqa sapaly ári tıimdi em kórsetýimiz úshin barlyq jaǵdaı jasalyp otyr. Aldaǵy ýaqytta jerlesterim úshin aıanbaı eńbek etemin»,-deıdi endoskopıst-dáriger.

Túrkistandyq dárigerler otany «A.N.Syzǵanov atyndaǵy Ulttyq ǵylymı hırýrgııa ortalyǵy» AQ-nyń klınıkalyq fızıologııa jáne endoskopııa bóliminiń meńgerýshisi Erlan Abdrashevtyń jetekshilik etýimen jasaǵan. Joǵary bilikti maman jergilikti áriptesterimen tájirıbe almasyp, sheberlik sabaǵyn tipti onlaın rejımde ótkizgen. Oblys boıynsha jalpy baýyr tsırrozyna shaldyqqan 600-ge jýyq naýqas tirkelgen. Dárigerler olarǵa dıeta saqtap, tıisti dári-dármekterin júıeli túrde qabyldaýǵa keńes beredi.

Aıta keteıik, óńirde mamandardyń biliktiligimen qatar klınıkalyq dıagnostıkalyq zerthanalyq qyzmetter sapasyn jaqsartýǵa jáne qural-jabdyqty, medıtsınalyq maqsattaǵy buıymdardy jetildirý máseleleri de basty nazarǵa alynǵan.

«Kadr biliktiligin arttyrý jáne qaıta daıarlaý» baǵdarlamasy óz jemisin berýde. Oblystyq qoǵamdyq densaýlyq basqarmasynyń basshysy Muqan Egizbaevtyń bastamasymen byltyr óńirde 2000-ǵa jýyq maman biliktiligin arttyryp, olardyń ishinde 200-den astam dáriger Reseıdiń Novosıbırsk qalasy men Týrkııa memleketinde tájirıbe almasyp qaıtqan. Búginde sol dárigerler alǵan bilimderiniń arqasynda óńirde jańa emdik operatsııa túrlerin jasap, talaı naýqastyń densaýlyqtaryn jaqsartýda.