Túrkistanda olımpıadalyq standartqa saı eskek esý kanaly salynady
TÚRKІSTAN. QazAqparat - Elimizde sý sporty túrlerin damytyp, Túrkistan qalasynda joǵary deńgeıdegi jarystar ótkizýge múmkindik týdy, dep habarlaıdy QazAqparat Túrkistan oblysy ákiminiń baspasóz qyzmetine silteme jasap.
Baspasóz qyzmetiniń málimetterine qaraǵanda, Túrkistan qalasyndaǵy ákimshilik - iskerlik ortalyǵynda Kazaqstanda balamasy joq sporttyq keshenderi bar eskek esý kanaly salynady. Halyqaralyq talaptarǵa saı olımpıadalyq ortalyq óńirde qolaıly mıkroklımat qalyptastyryp, sáýlettik kórkin keltirýmen qosa, týrızm salasyn damytýǵa sep bolmaq.
Oblys ákimi Ómirzaq Shókeev elimizde teńdesi joq sý kesheniniń jańa bastalǵan qurylys alańynda boldy. Halyqaralyq dárejedegi eskek esý jəne baıdarka sporty boıynsha olımpıadalyq standartqa saı ortalyq 100 gektarǵa jýyq alańda ornalasady. Kanaldyń betki aýdany 47,9 ga. Jalpy uzyndyǵy - 2222 m. Kanaldyń eni 260 m, tereńdigi 4 m. Tolyq saraptaý júrgizilip, kontseptsııalyq joba ázirlengen.
Sport kesheninde qonaqúı, velojolaq, basseın, ellıng, kanoege arnalǵan pırster, kórermenderge arnalǵan tablo, trıbýnalar, araldardy qosatyn kópir jáne taǵy basqa nysandar ornalasady. Jańa joba Kensaı-Qosqorǵan-2 sý qoımasynan ákimshilik-iskerlik ortalyǵyndaǵy 9 jáne 11 kóshede qurylysy júrgizilip jatqan kanal arqyly keletin jetkizgish arna bolmaq. Esý kanalynan Shoshqakól sý júıesine deıin jetkizý-shyǵarý arnasy bolady.
Sonymen qatar Ómirzaq Estaıuly drama teatrynyń, oblystyq ǵylymı-ámbebap kitaphananyń, qaladaǵy 6,7 jáne 8 qabatty 14 turǵyn úıdiń, eki dańǵyldy qosatyn jańa kópirdiń jobalarymen tanysty. Jumys barysyn baıandaǵan jaýapty merdigerlerge naqty tapsyrmalar berip, jobalarǵa ózgerister engizdi.
Oblys ákimi qala irgesinde ornalasqan dendrobaq qurylysynyń basynda boldy. 27 gektar jasyl aýmaqta san túrli jemis aǵashtary men kópjyldyq ósimdik túrleri ósiriledi. Qurylysy júrip jatqan jasyl baqtyń 2360 sh.m aýmaǵyna gúlder egilip, 20 476 sh.m jerine kógaldandyrý jumystary júrgizilip jatyr. Baqqa akatsııa, talshyn, katalpa, eldar qaraǵaıy, qara qaraǵaı, qyrym qaraǵaıy, shynar syndy 12 000 tal túrleri egilýde. Munda amfıteatrlar, balalar alańdary, sýburqaqtar, qyz júzim ósiriletin dızaınerlik joba, jasandy kól men kópirler salynady. Ómirzaq Estaıuly egiletin kóshet sanyn kóbeıtip, jasandy kóldiń kólemin úlkeıtýdi tapsyrdy.
«Jumysqa júregińdi sal. Jan - tánińmen eńbek et. Mine, sonda ǵana is ónedi. Óz isińniń has sheberi bolasyń. Ol úshin qolǵa alǵan isti bar ynta - jigerińmen isteý kerek»,- dedi merdilerlermen jáne qurylysshylarmen kezdesken oblys ákimi.
Sondaı - aq, aımaq basshysy osydan týra 1 jyl buryn, dál osy kúni alǵashqy qazyǵy qaǵylǵan «Kerýen saraı» kesheninde boldy. Investıtsııalyq joba aldaǵy naýryz aıynda tolyq aıaqtalyp, el ıgiligine berilmek. Qaladaǵy qurylys alańdaryn aralaǵan oblys basshysy, jumystardyń kestege sáıkes júrgizilip jatqanyna kóz jetkizdi.
Qurylys nysanynda 67 tehnıka jáne 1320 adam jumyspen qamtylǵan. Týrıster úshin qyzmet kórsetetin teńdessiz nysannyń qurylysy qarqyndy. Shyǵys stılindegi kóp fýnktsıonaldy zamanaýı týrıstik qalashyq aýmaǵynda ártúrli deńgeıdegi qonaq úıler, ushatyn teatr, amfıteatr,
attraktsıondar, meıramhanalar, kınoteatr, otbasylyq oıyn-saýyq kesheni, shyǵys bazary t.b. ǵımarattar ornalasady. Jalpy qurylys alańy 20,5 ga aýqymdy jerdi qamtıdy.
