Túrkistanda olımpıada rezervin daıarlaý ortalyǵynyń jańa ǵımaraty ashyldy
TÚRKІSTAN. QazAqparat - Túrkistan qalasynda olımpıada rezervin daıarlaý ortalyǵynyń jańa ǵımaraty ashyldy. Túrkistan oblysynyń ákimi Ómirzaq Shókeev ákimshilik-iskerlik ortalyǵynda boı túzegen sport kesheniniń ashylý saltanatyna qatysty, dep habarlaıdy QazAqparat tilshisi.
Qazaqstan Respýblıkasynyń Tuńǵysh Prezıdenti Nursultan Nazarbaev Túrkistan qalasyna jumys sapyrymen kelgen kezde memlekettik organdar men ulttyq kompanııa basshylary Túrkistan oblysyn kórkeıtý maqsatynda árbir ǵımaratty salýǵa kómektesýleri qajet ekendigin aıtqan bolatyn. Osy rette, Soltústik Qazaqstan oblysy oblys ortalyǵynan zamanaýı úlgidegi sport keshenin salyp, el ıgiligine berdi. Búgin túrkistandyq sportshylardy qýantqan jıynǵa arnaıy qatysqan Túrkistan oblysynyń ákimi jańa ǵımarattyń tusaýkeser lentasyn qıdy.
Jalpy aýmaǵy 3,75 gektar jerdi alyp jatqan halyqaralyq talaptarǵa saı boı túzegen bul sport kesheninde bir mezette 220-ǵa jýyq sportshy jattyǵa alady.
Túrkistan oblysy Dene shynyqtyrý jáne sport basqarmasynyń basshysy Polat Qyryqbaev mundaı keshenderdiń kóptep ashylýy Tokıo olımpıadasynda sportshylarymyzdy jaqsy nátıjelerge jeteleıtinin aıtty.
Al, olımpıada rezervin daıarlaý ortalyǵynyń dırektory Nurlan Aıtbekov bul keshen áli talaı sportshyny jeńiske bastaıtynyn atap ótti.
Jalpy, ortalyqta 148 sportshy kásibı turǵyda shuǵyldanady. Onyń ishinde 5 sportshy halyqaralyq dárejedegi sport sheberi, 22 sportshy Qazaqstan Respýblıkasynyń sport sheberi, 121 sportshy sport sheberligine úmitker.
Keshenniń ashylýyna oraı voleıboldan oblys chempıonaty uıymdastyryldy. Sharshy alańda Túrkistan oblysynyń «Jaýqazyndar» komandasy men Shardara aýdanynyń «Shardara shaǵalalary» voleıbol komandalary kezdesip, 2:1 upaımen shardaralyqtar jeńiske jetti.
