Túrkistanda oqytýshylar biliktilik arttyrý kýrstarynan ótip jatyr
TÚRKІSTAN. QazAqparat – Elimizde kásipkerlik negizderin mektep oqýshylary ǵana emes kolledj stýdentteri de oqıtyn bolady. Bul shara Túrkistan qalasyndaǵy mektepter men kolledjderde de júzege asyrylyp otyr, dep habarlaıdy QazAqparat tilshisi.
Oblys ortalyǵynyń oqytýshylary «Kásipkerlik negizderi jáne bıznes» pánin oqytý boıynsha biliktilik arttyrý kýrstarynan ótip jatyr. «Nátıjeli jumyspen qamtýdyń 2017-2021 jyldarǵa arnalǵan »Eńbek« baǵdarlamasy aıasynda iske asyp jatqan bul jobada, túrkistandyq 300 mektep muǵalimderi men 60 kolledj oqytýshylary biliktiligin arttyrýda. Osylaısha, jańa oqý jylynan bastap, on myńǵa jýyq jasóspirim kásipkerlik negizderin kolledj jáne mektep qabyrǵasynan meńgeredi.
Aıta keteıik, «Atameken» UKP «Kásipkerlik jáne bıznes negizderi» pánin ázirleý jumysynyń jobasyn 2014 jyly bastaǵan bolatyn. Sol ýaqytta Túrkistanda bul joba alǵash ret Atatúrik atyndaǵy №17 mektepke engizilgen edi. Endigi jerde oqýshylardyń kásipkerlikke qyzyǵýshylyǵyn arttyrǵan bul pándi oblysymyzdyń mektepterinde ǵana emes, Respýblıka boıynsha 100 myń kolledj stýdentterine de oqytylady. Nátıjesinde aldaǵy ýaqytta pándi engizýmen óńir ekonomıkasyndaǵy bıznestiń úlesi jáne jalpy bıznestiń damý kórinisi aıtarlyqtaı jaqsarady dep kútilýde.
Oqytý 19-29 tamyz jáne 2 -13 qyrkúıek aralyǵynda ótedi dep josparlanǵan. On kúndik kýrsta bıznes trenerler oqytýshylarǵa jalpy kásipkerlik jaıly saýatty túsinik qalyptastyryp, óńir ereksheligine baılanysty kásipkerliktiń qyr-syryn meńgertedi. Salyq tóleý rejımderin, marketıng negizderimen tanystyrady. Sondaı-aq zamanaýı jobalardy júzege asyrý joldary men memlekettik baǵdarlamalar jaıly tolyq maǵlumat beredi.
