Túrkistanda oblystyq jedel járdem ortalyǵy ashyldy
Ashylý rásimine oblys ákimi Janseıit Túımebaev qatysty. Saltanatty shara barysynda «Oblystyq jedel járdem medıtsınalyq stansasyna» úsh sý jańa arnaıy kólik syıǵa tartyldy.
«Túrkistan oblysynda medıtsına salasynda atqarylyp jatqan jumystar jetkilikti. Kompıýtermen qamtamasyz etý, tsıfrlandyrý, mekemelerdi kólikpen qamtý - osynyń barlyǵy óz retimen, jetkilikti deńgeıge júrgizilip keledi. Ásirese, salalyq dárigerlerdiń bilimin jetildirý jumystaryna toqtalar bolsaq, ótken jyldardy aıtpaǵannyń ózinde, bıyl birneshe maman shetelde bilimin jetildirip qaıtty. Bul, óz kezeginde, óńirimizdegi atalǵan salanyń odan ári damyp, órkendeýine jol ashady dep bilemin», - dedi ákim ortalyqqa tartý etilgen kólikterdiń kiltin tabystaý kezinde.
Osyǵan deıin «Túrkistan qalalyq jedel járdem medıtsınalyq stansasy» bolyp kelgen mekeme ataýy «Oblystyq jedel járdem medıtsınalyq ortalyǵy» bolyp ózgerdi jáne jańa ǵımaratqa kóshti. Oblys aýmaǵynda táýligine emhanalyq kómekke qaralatyn 34 myń adamǵa jedel medıtsınalyq kómekke júginetin 5 myńnan astam adam tirkeledi.
Ortalyq tolyqtaı «Kómek» baǵdarlamasynyń avtomattandyrylǵan basqarý júıesimen jumys isteıdi.
Sonymen qatar, 2019 jyldan bastap Túrkistan oblysy aýdandaryndaǵy jedel járdem stansalary ortalyqtandyrylady. Bul jerde Call-ortalyq jumys isteıdi. Barlyq aýdandardaǵy jedel járdem stansasynyń jumysy osy ortalyqtyń qadaǵalaýynda bolady. Bul degenimiz, Túrkistan oblysynyń kez kelgen eldi mekeninen habarlasqan naýqastyń qońyraýy tikeleı ortalyqqa qosylady degen sóz. Shaqyrtý túsken jerge eń jaqyn brıgadany anyqtap, naýqas jaıly tolyq aqparat jiberiledi. Osylaısha, alǵashqy medıtsınalyq kómek jedel ári sapaly kórsetiledi.
Medıtsınalyq uıymdardy materıaldyq- tehnıkalyq qondyrǵylarmen qamtamasyz etýge bıyl 8 mlrd teńge bólinip, jaraqtalý kórsetkishi 65,7 paıyzǵa jetken. Aldaǵy ýaqytta Túrkistan oblysynda perınataldyq, mamandandyrylǵan kardıologııalyq, onkologııalyq, psıhonevrologııalyq, narkologııalyq ortalyqtar men emhanalar salý josparlanýda. Jyl basynan beri 47 sanıtarlyq jáne arnaıy avtokólik satyp alynyp, halyq ıgiligine paıdalanýǵa berilgen. Sondaı-aq, memlekettik -jekemenshik áriptestik aıasynda jedel járdem qyzmetin senimgerlikke basqarýǵa berý josparlanyp otyr. Bul baǵytta oblys boıynsha 150 sanıtarlyq avtokólikpen qamtamasyz etý kózdelýde.
Elbasy N.Á.Nazarbaevtyń Qazaqstan halqyna arnaǵan Joldaýynda berilgen tapsyrmalardyń biri - 2019 jyldyń 1 qańtarynan bastap medıtsına salasyn qaǵazsyz qujat aınalymyna kóshirý. Elbasy bıylǵy Joldaýynda «Aqparattyq júıelerdi biriktirý, mobıldik tsıfrlyq qosymshalardy qoldaný, elektrondyq densaýlyq pasportyn engizý, «qaǵaz qoldanbaıtyn aýrýhanaǵa» kóshý arqyly medıtsınalyq kómektiń qoljetimdiligi men tıimdiligin arttyrý qajet», dep densaýlyq saqtaý salasynyń mamandaryna mindet júktegeni belgili. Memleket basshysynyń joldaýda kórsetilgen tapsyrmasyn basty nazarǵa ala otyryp, Túrkistan oblysynyń densaýlyq saqtaý salasy 100 paıyz tsıfrlyq júıege kóship, qaǵazsyz jumys isteýge bet burdy.
