Túrkistanda oblystyq sottyń jańa ǵımaraty salynady
ASTANA. QazAqpara - Túrkistanda oblystyq sottyń jańa ǵımaraty salynady. Bul týraly Parlament Májilisiniń jalpy otyrysynda QR Ulttyq ekonomıka birinshi vıtse-mınıstri Rýslan Dálenov málim etti, dep habarlaıdy QazAqparat.
«Oblystyq sot Túrkistan qalasyna aýystyrylyp, ýaqytsha ornalasý máselesi sheshildi. Júıeli negizde 2,7 mlrd teńge somaǵa jańa ǵımarattyń qurylysy josparlanýda. Ol keshendi jospar aıasynda salynady. Bul qarjyny respýblıkalyq bıýdjetten qarastyrý eskerilgen», - dedi Rýslan Dálenov.
Sonymen qatar, ol Shymkentte jańa qalalyq sot, tórt aýdandyq sot qurylǵanyn eske salyp ótti.
Budan buryn habarlanǵandaı, búgin Parlament Májilisiniń jalpy otyrysynda «Qazaqstan Respýblıkasynyń keıbir konstıtýtsııalyq zańdaryna Qazaqstan Respýblıkasynyń ákimshilik-aýmaqtyq qurylysy máseleleri boıynsha ózgerister engizý týraly» zań jobasy birinshi oqylymda maquldandy.
Belgili bolǵandaı, aldaǵy segiz jylda Shymkent respýblıkalyq bıýdjettiń donor qalasy deńgeıine jetedi.
