Túrkistanda oblystyq Qazaqstan halqy Assambleıasynyń HHІI sessııasy ótti
Basqosýǵa Túrkistan oblysy ákiminiń orynbasary Sáken Qalqamanov pen oblystyq máslıhat depýtattary, zııaly qaýym ókilderi, ardagerler, quqyq qorǵaý organdarynyń jetekshileri, basqarma basshylary, aýdan, qala ákimderi qatysty. Sondaı-aq, oblystyq assambleıa janyndaǵy qurylymdardyń jetekshileri, etnomádenı birlestikterdiń, dinı konfessııalardyń, saıası partııalardyń, úkimettik emes uıymdardyń músheleri, ardagerler men kásipkerler men BAQ ókilderi shaqyryldy. Alqaly jıynda memlekettik saıasat aıasynda atqarylǵan jumystar saralanyp, aldaǵy negizgi mindetter aıqyndaldy.
«1995 jyly Elbasy N.Nazarbaevtyń bastamasymen qurylǵan Qazaqstan halqy Assambleıasy osy ýaqyt aralyǵynda ózine júktelgen tarıhı mıssııany úlken abyroımen atqaryp keledi. QR Tuńǵysh Prezıdentiniń sarabdal saıasatynyń arqasynda jalpyulttyq birlik pen qoǵamdyq kelisim – elimizdiń basty tuǵyryna aınaldy. Aldymyzda san-qyrly mindetter tur. Eń bastysy – ishki birlikti bekemdeý bolsa, ekinshisi – oblys ortalyǵy Túrkistandy túletý», – dedi oblys ákiminiń orynbasary Sáken Qalqamanov.
Jıynda sondaı-aq, qoǵamdyq jumystarǵa belsene aralasqan jáne el birligin qalyptastyrýǵa úles qosqan etnomádenı birlestiktiń músheleri, qoǵamdyq kelisim men jalpyulttyq birlik salasyndaǵy memlekettik saıasatty jergilikti jerde tabysty iske asyrýǵa úles qosqan birqatar azamattar Túrkistan oblysy ákiminiń alǵys hatymen marapattaldy.
Aıta keteıik, óńirde 11 etnomádenı birlestik pen olardyń aýdandyq, qalalyq 7 fılıaly jáne 14 ókildigi jumys atqarady. Ár etnostyń salt-dástúrin, ádep-ǵurpyn, mádenıeti men tilin dáripteý baǵytynda etnomádenı birlestikter janynan jeksenbilik mektepter men jastar qanaty ashylǵan.
