Túrkistanda Nur Otan-nyń qoǵamdyq qabyldaýyna kelgen azamat jumysqa shaqyrtý aldy
Alǵash ret áleýmettik jeli arqyly tikeleı efırde ótken qoǵamdyq qabyldaýda Hakım Kóshqalıev azamattardyń ótinishterin tyńdap, sybaılas jemqorlyq máseleleri boıynsha qoıylǵan birqatar suraqtarǵa jaýap berdi
Qabyldaýǵa kelgen Túrkistan qalasynyń turǵyny Qurmanbaı Myrzaqulov ózin muǵalimdikten bosatqan mektep dırektoryna qatysty shaǵym aıtty. Onyń sózinshe, qalalyq bilim bólimine qarasty MQKK «Qolóner mektebinde» dırektordyń oqý isi jónindegi orynbasary qyzmetin atqarǵan. Al, ótken jyly 3 qazanda mektep dırektory Q. Myrzaqulov shtat birligin zańsyz qysqartqan. Qolynda dálel-dáıekteri bar azamat munymen kelispeı, sotqa da júgingenin aıtady. Sebebi qolóner mektebiniń basshylyǵy ata-analardyń qoly qoıylǵan jalǵan qujat jasatyp, demalys kezinde oqýshylar sanyn da qysqartqan. Mektepte 93 balany qaldyrǵan. Qazaqstanda balamasy joq mekteptiń búgingi taǵdyryna alańdaǵan departament basshysy bul isti nazarǵa alatynyn jetkizdi.
Al, Kentaý qalalyq emhanasynda operator qyzmetin atqaratyn múmkindigi shekteýli jan Anarkúl Anarbekova ózi qyzmet etetin emhanada býhgalterlik qyzmetke kirgisi keletinin jetkizdi. 2015 jyly esepshi kýrsyn aıaqtaǵan ony emhana basshylyǵy kemsitip, atalǵan jumysty bir qolmen ıgere almaısyń dep jaýap qatqan. Ádildik pen adamı qarym-qatynas izdegen azamatsha «Nur Otan» partııasy Túrkistan oblystyq fılıalyna arnaıy kelgenin aıtty. Bul máselege oraı Hakım Kóshqalıev azamattyq tanytyp, jarymjan azamatshany QR Sybaılas jemqorlyqqa qarsy is-qımyl agenttigi oblystyq departamentine býhgalterlik jumysqa shaqyrdy.
Aıta keteıik, «Nur Otan» partııasy oblystyq fılıalynyń Qoǵamdyq qabyldaýy áleýmettik jelide tikeleı efırde ótti. Vırtýaldy Qoǵamdyq qabyldaýda azamattar tarapynan birshama saýaldar qoıylyp, olarǵa tıisinshe shuǵyl jaýaptar joldandy. Partııa fılıalynyń xalyqpen tildesýdegi jańa bastamasy ary qaraı da jalǵasyn tabady dep kútilýde.
