Túrkistanda nesıege beriletin úıler boıynsha aqparattyq ortalyq ashyldy
TÚRKІSTAN. QazAqparat – Túrkistan qalasynda nesıege beriletin baspanalar boıynsha aqparat beretin turǵyn úı satý ortalyǵy ashyldy.
Neke saraıynyń ǵımaratynda ornalasqan ortalyqta azamattar 7-20-25 ıpotekalyq baǵdarlamasy jaıly tolyq málimet alyp, sońǵy aqparattar men memlekettik baǵdarlamalarmen tanysa alady, dep habarlaıdy QazAqparat tilshisi.
Oblys ákimi Ómirzaq Shókeevtiń tapsyrmasymen ashylǵan ortalyqta turǵyndardyń baspana alýǵa ótinish berýine múmkindik jasalǵan. Sondaı-aq, arnaıy saıtty qarap jáne aqparattyq ortalyqtaǵy mamandardan keńes ala alady.
Aıta keteıik, aǵymdaǵy jyldyń naýryz aıynda Túrkistan qalasyndaǵy 16 kópqabatty turǵyn úı tapsyrylady dep josparlanǵan. Onda páterlerdiń sharshy metri 180 myń teńgeden satylymǵa shyǵarylmaq. Óz kezeginde atalǵan ortalyqtyń ashylýyna qatysqan oblys ákimi jaýapty organdarǵa júıeli jumystar júrgizýge naqty tapsyrma berdi. Baspanaly bolýǵa nıetti árbir azamattyń ótinishin júzege asyrýǵa kúsh salýdy mindettedi.
