Túrkistanda «Neke tour» baıqaýynda jeńimpaz atanǵan juptardyń nekesi qıyldy
Buǵan deıin habarlaǵanymyzdaı, Túrkistan oblysynyń Mádenıet jáne týrızm basqarmasynyń «Open Turkistan» týrıstik-aqparat ortalyǵy «Neke tour» respýblıkalyq baıqaýyn jarııalaǵan bolatyn. Baıqaý sharttary boıynsha, jas otaý ıeleri 3-9 sáýir aralyǵynda neke-turkistan.kz portaly arqyly onlaın-ótinim joldady.
Búgin Túrkistan qalasyna atalǵan baıqaýdyń jeńimpazy atanǵan 15- juptyń 14-i keldi. Іs shara barysynda olardyń nekesi qıyldy. Túrkistanǵa joldama alǵan jeńimpazdarǵa eki kún boıy qurmet kórsetiledi. Máselen, búgin romantıkalyq keshki as, fotosessııa jáne mádenı baǵdarlama uıymdastyrylsa, erteń qalanyń kórikti oryndary men qala mańyndaǵy kıeli jerlerge zııarat etý josparlanǵan.
15 sáýir – Qozy Kórpesh pen Baıan Sulý kúnine oraı uıymdastyrylǵan sharany Túrkistan oblysy Mádenıet jáne týrızm basqarmasy basshysynyń orynbasary Ádil Qonysbekov ashyp berip, baıqaý jeńimpazdaryn marapattady.
«Bıylǵy jyly Ramazan aıymen tuspa-tus kelip otyrǵan «Qozy kórpesh- Baıan sulý» kúni qasıetti shaharda erekshe formatta atap ótilýde. Osy merekege oraı uıymdastyrylǵan «Neke tour» respýblıkalyq baıqaýy qoǵamnyń erekshe qyzyǵýshylyǵyn týdyrdy. El kóleminde alǵash ret uıymdastyrylǵan jobaǵa 345 jup ótinim berip, baıqaýdyń mańyzdylyǵyn arttyrdy», – degen ol kópshilikti merekemen quttyqtady.
Túrkistan qalasynyń bas ımamy nekelerin jańa qıǵan januıalarǵa otbasylyq ómirdiń jaýapkershiligi týraly túsindirip ótti.
«Shańyraq» nomınatsııasy boıynsha Shyńǵys Nurǵazy men Asyltas Rahı jeńimpaz atandy. «Mahabbat» nomınatsııasyn Tımýr Shantıev pen Gúlsara Majenova, Baýyrjan men Aıman Ýtaevtar, Nurlan Taıǵanov pen Jasmın Túmenbaeva, Almat men Aqnur Káden ıelendi.
«Arý» nomınatsııasyna Bekzat Beısenbaev pen Aıan Ahmetova, Darhan Qorǵanbek pen Sandýǵash Tóleýova, Nurperzent Nurlanov pen Jibek Beskepe, Qanat Shákárim men Saǵymbek Mereke ıe boldy.
Al «Januıa» nomınatsııasy Eldos Dúıjanov pen Galına Serikbaeva, Baqdáýlet Shahataı men Adelııa Joldybaı, Qaısar Túıinbekov pen Saıajan Iman, Jandos Saparǵalı men Akbota Ǵazez, Sattar Shaımerden men Nurgúl Beristenbekke, Bekbolat Óten men Jazıra Júsipke buıyrdy.
