Túrkistanda Nıý-Iork baspaldaǵy tárizdi nysan boı kóterdi
TÚRKІSTAN. QazAqparat - Túrkistan qalasynda ashyq aspan astynda ótetin dýmandy merekelerge arnalǵan jańa alań paıda boldy. Qazirgi ýaqytta shahardaǵy Esimhan alańynda álemge áıgili Nıý-Iork baspaldaǵy salynýda, dep habarlaıdy QazAqparat oblys ákiminiń baspasóz qyzmetine silteme jasap.
Ashyq aspan astynda ornalasqan erekshe dızaındy demalys ornynda «Open Space» úlgisindegi is-sharalar, san alýan saıystar men festıvalder ótkiziledi. Túrkistandyqtar men óńir qonaqtary úlken ekranda tegin fılmder men fýtbol oıyndaryn tamashalaı alady.
Turǵyndardy mádenı, rýhanı jaǵynan baıytý, olardy birlikke shaqyrý, jazdyń keshki kúnderin kóńildi ótkizýge septigin tıgizý maqsatynda qolǵa alynǵan jańa joba kóp uzamaı iske qosylady dep josparlanýda. Ashyq sahnaly, aınalmaly baspaldaqty demalys ornynyń bıiktigi – 4,5 metr, eni – 11 metrge eseptelgen. Erekshe sáýletimen tań qaldyratyn Nıý-Iork baspaldaǵy jastar men týrısterdiń súıikti demalys ornyna aınalary sózsiz.
Túrkistan qalasynda qurylys jumystary jospar boıynsha júrip jatyr. Qurylysshylar eńbek qaýipsizdigimen qatar, tótenshe jaǵdaı erejelerin qatań ustanýda. Barlyq sanıtarlyq talaptar kúsheıtilgen.
