Túrkistanda mýzyka kolledji men neke saraıy salynady - Janseıit Túımebaev
TÚRKІSTAN. QazAqparat - Elbasy N. Nazarbaevtyń tapsyrmasymen Túrkistan qalasynda halyqqa qyzmet kórsetý ortalyǵy men neke saraıy, mýzykalyq kolledj ben kóptegen attrakıondary bar demalys orny salynady. Bul týraly búgin oblys ákimi Janseıit Túımebaev halyq aldynda esep berý jıynynda málimdedi, dep habarlaıdy QazAqparat tilshisi.
Aımaq basshysynyń sózinshe, óńirde kásipkerlikti qoldaý maqsatynda «Ońtústik» aımaqtyq ınvestıtsııalyq ortalyǵy 2018 jyly 6 mlrd teńgege 1 292 joba qarjylandyrǵan.
«Nátıjesinde 1 403 jumys orny ashylǵan. Budan bólek, «Bıznestiń jol kartasy-2020» baǵdarlamasy aıasynda 4,5 mlrd teńge bólinip, 456 joba qoldaý tapty. Sondaı-aq oblysqa 288,1 mlrd teńge ınvestıtsııa tartylǵan. Investorlarǵa «bir tereze» qaǵıdatymen qyzmet kórsetetin «TURKISTAN INVEST» kompanııasy qurylyp, qazir 1 mlrd 147 mln AQSh dollaryn quraıtyn, 14 myńnan astam jumys oryndarymen qamtamasyz etetin 24 iri ınvestıtsııalyq joba qoldaý taýyp otyr. Sondaı-aq, Túrkistanda alǵash ret «Kóne Túrkistan - jańa múmkindikter» atty halyqaralyq ınvestıtsııalyq jáne týrıstik forým ótti. Atqarylǵan sharalardyń nátıjesinde jeke ınvestıtsııa kólemi 166 mlrd. teńgege jetip, ósim 114,2% qurady»,-dedi Janseıit Túımebaev.
Budan ózge, Túrkistan oblysy aýyl sharýashylyǵy ónimin óndirýde ózge oblystarmen salystyrǵanda kósh ilgeri. Ótken jyly 542,8 mlrd teńgeniń ónimi aýyl sharýashylyǵy salasynda óndirilip, ósim 105,3 paıyzdy quraǵan. Eksporttyń kólemi 180,9 mln. AQSh dollarǵa jetip, 20,2 mln. dollarǵa artty. Onyń ishinde, byltyr Qazaqstandaǵy et eksportynyń 54 paıyzdyq úlesi Túrkistan oblysyna tıesili bolyp, respýblıkada 1-orynǵa shyqty.
