Túrkistanda mýzeı qyzmetkerlerine arnalǵan kýrs bastaldy
TÚRKІSTAN. QazAqparat - Mádenıet jáne sport mınıstrliginiń uıymdastyrýymen «Áziret Sultan» memlekettik tarıhı-mádenı qoryq-mýzeıiniń bazasynda mýzeı qyzmetkerleriniń biliktiligin arttyrý kýrsy óz jumysyn bastady, dep habarlaıdy QazAqparat vedomstvonyń baspasóz qyzmetine silteme jasap.
Qazaqstannyń tarıhı jáne mádenı týrıstik áleýetin halyqaralyq deńgeıde tanytý jáne týrızmdi damytýdaǵy ilkimdi qadamdarǵa qajetti biliktilikti shyńdaý baǵytynda qolǵa alynǵan basqosýdy «Áziret Sultan» memlekettik tarıhı-mádenı qoryq-mýzeıiniń dırektory Nurbolat Ahmetjanov ashyp berip, dáris júrgizýshi mamandardy tanystyrdy. Sondaı-aq, týrıstermen jumys jasaýda zaman aǵymyna sáıkes biliktilik pen tájirıbeni shyńdaı otyryp, sheteldik metodıkany da meńgerý, jan-jaqtylyqty qalyptastyrý - mýzeı úshin eń basty mindet ekenin aıtqan qoryq-mýzeı basshysy semınar qatysýshylaryna sáttilik tiledi.
Jahandaný zamanynda qoryq-mýzeı qyzmetkerleriniń joǵary deńgeıdegi qyzmet tıimdiligin arttyrý maqsatynda uıymdastyrylǵan dáriske Mádenıet jáne sport mınıstrligine qarasty «Áziret Sultan» memlekettik tarıhı-mádenı mýzeı-qoryǵy», «Ejelgi Taraz eskertkishteri» memlekettik tarıhı-mádenı mýzeı-qoryǵy», «Esik» memlekettik tarıhı-mádenı mýzeı-qoryǵy», «Ordabasy» ulttyq tarıhı-mádenı qoryǵy» jáne «Otyrar» memlekettik arheologııalyq mýzeı-qoryǵynan 30 ekskýrsııa júrgizýshileri qatysýda.
Bes kúnge arnalǵan kýrsta qoryq-mýzeılerge qarasty tarıh jáne mádenıet eskertkishteri men mýzeı zaldarynyń ekspozıtsııalaryn jurtshylyqqa usyný, tanystyrýdy tartymdy jáne sapaly júrgizý, jan-jaqty biliktilik, kásibı etıka syndy taqyryptar tereń túsindirilip, pikir almasý jáne sheberlik dáristeri ótedi. Sondaı-aq, ishki jáne syrtqy týrızm salasyn damytýdaǵy ekskýrtsııalyq qyzmet kórsetýdiń mańyzy men zamanaýı ádistemeleri de kýrstyń basty taqyryby retinde qarastyrylǵan.
Aıta ketsek, 27-31 tamyz aralyǵynda Túrkistan qalasynda ótetin biliktilik kýrsynda «Arman-týr» halyqaralyq týrıstik agenttiginiń, aýdarmashylar jáne gıdter mektebiniń dırektory, Jibek jolynyń resmı ekskýrsovody, ulttyq jattyqtyrýshy - Abjanova Saltanat Agzamqyzy, Beıbitshilik jáne Kelisim Saraıynyń ekskýrsııa bóliminiń basshysy, tájirıbeli ekskýrsovod Muqyshbaeva Ardaq Keńesqalıqyzy dáris júrgizedi.
