Túrkistanda muz saraıy men «Daryn» mektep-ınternaty salynyp jatyr
TÚRKІSTAN. QazAqparat - Túrkistan oblysynyń ákimi Ómirzaq Shókeev Túrkistandy abattandyrý jumystary men birqatar qurylys nysandarynyń jaı-kúıin baǵdarlaý úshin shahardy kezekti ret aralap shyqty, dep habarlaıdy QazAqparat tilshisi.
Óńir basshysy áýejaı baǵytyndaǵy aýmaqtaǵy jasyl beldeý men Shaǵa kóliniń jaǵdaıymen tanysyp, abattandyrý jáne kógaldandyrý jumystaryn tekserdi.
Odan keıin óńir basshysy Túrkistan qalasynyń damýynda asa mańyzdy birqatar qurylys nysandaryn aralady. Solardyń biri – qysqy sport túrlerine arnalǵan ǵımarat. Muz saraıynyń qurylysy bıyl tamyz aıynda bastalǵan. Jalpy jer aýmaǵy – 1,92 gektar, ǵımarat qurylysynyń kólemi – 4160,9 sharshy metr. Búginde nysannyń irgetasy qalanyp, birinshi qabatyn kóterý jumystary júrip jatyr. Bul ǵımaratta qysqy sport túrleri damytylyp, úıirmeler ashylady. Túrkistan tarıhynda tuńǵysh ret qysqy sportpen kásibı túrde aınalysýǵa múmkindik jasalady.
Aımaq basshysy Túrkistanda básekege qabiletti bilim uıalarynyń boı kóterýine aıryqsha basymdyq beredi. «Daryn» mektep-ınternatynyń qurylysyna arnaıy barǵan ol nysandy ýaqytyly ári sapaly tapsyrý kerektigin aıtty. 700 oqýshyǵa arnalǵan mektep pen 500 oryndyq jataqhananyń qurylysyn 70 jumysshy júrgizip jatyr. Qurylys jumystary bıyl sáýir aıynda bastalǵan. Oqý korpýsynyń irgetasy quıylyp, kirpishi qalanýda. Jataqhananyń da irgetasy daıyn. Bul nysan 2022 jyly paıdalanýǵa beriledi dep kútilýde.
Sondaı-aq, Túrkistanda 25 brıgadaǵa arnalǵan oblystyq jedel járdem stantsııasynyń da qurylysy júrip jatyr. Búgingi tańda qurylys-montajdaý jumystary qarqyndy. Ákimshilik ǵımaratynyń kirpishi qalanyp, baǵanalary quıylǵan, ishki árleý jumystary júrip jatyr. Sonymen qatar 25 jedel járdem kóligine arnalǵan garaj, kólik jýatyn oryn, avtokólik sheberhanasynyń qabyrǵalary qalanǵan.
Ómirzaq Shókeev árbir nysannyń oblys úshin mańyzy baryn aıta kele merdigerler men jaýapty basshylarǵa jumysty janashyrlyqpen atqarýdy tapsyrdy. Ǵımarattardyń sapasy ákimdik tarapynan qatań qadaǵalanyp, talapqa saı bolýyna mán beriledi.
