Túrkistanda munaı óńdeý zaýyty men onkologııalyq ortalyq salynady

TÚRKІSTAN. QazAqparat -  Túrkistan qalasynda ótken Halyqaralyq ınvestıtsııalyq jəne týrıstik forým aıasynda oblys ákimi Janseıit Túımebaev Irannyń «Ardabil Petrochemical Co» kompanııasymen jalpy quny 205 mln dollardy quraıtyn onkologııalyq ortalyq pen munaı óńdeý zaýytyn salý jóninde memorandýmǵa qol qoıdy, dep habarlaıdy QazAqparat tilshisi.

Forýmda jalpy quny 1,7 mlrd AQSh dollardy quraıtyn 19 memorandýmǵa qol qoıyldy. Atap aıtqanda, Túrkistan oblysy ákimdigi men Iran, Túrkııa, Chehııa, Reseı, BAÁ, Malaızııa, Italııa, Polsha, Qytaı memleketteriniń ınvestorlary arasynda kelisimder jasaldy. Sonymen qatar, qytaılyq «Changchun Longyuan Power Equipment Co. LTD» kompanııasymen energetıkalyq qurylǵylar men buıymdar jasaý jóninde quny 648 mln AQSh dollary kólemindegi ýaǵdalastyqqa qol jetkizildi. Al Reseıdiń «Green Land Alatau» JShS 180 mln AQSh dollaryna jylyjaı kesheniniń qurylysyn júrgizetin boldy. 

Forým barysynda túzilgen memorandýmǵa sáıkes, qytaılyq «Shanghai Lianfu New Energy Science & Technology Group» kompanııasymen 340 mln AQSh dollaryna kún energııasymen júretin elektroavtobýstar shyǵaratyn zaýyt qurylysyn salý boıynsha kelisim túzildi. Sondaı-aq, Túrkııadan kelgen «Dogus Insaat ve Ticaret A.S.» óndiris orny jalpy quny 100 mln AQSh dollaryna ınfraqurylym salasyndaǵy jobalardy júzege asyrýda áriptestik tanytsa, ırandyq «Faradid Meehan» kompanııasy 5 mln AQSh dollaryna kirpish zaýytyn salatyn boldy.