Túrkistanda «Meniń týym, meniń Otanym!» patrıottyq aktsııasy ótti

TÚRKІSTAN. QazAqparat – Túrkistanda «Meniń Týym, meniń Otanym!» patrıottyq aktsııasy ótti. «Nur Otan» partııasynyń oblystyq fılıaly uıymdastyrǵan sharada «Mega city» saýda sattyq ortalyǵyna memlekettik Tý ornatylyp, shara sońy merekelik baǵdarlamaǵa ulasty, dep habarlaıdy QazAqparat tilshisi.

Saltanatty jıynda «Nur Otan» partııasy Túrkistan oblystyq fılıaly tóraǵasynyń birinshi orynbasary Beısenbaı Tájibaev rámizderdi qurmetteý barshaǵa ortaq paryz ekenin jetkizdi.

«Árbir memlekettiń uly qundylyqtary bolady. Memlekettik rámizderdi osy sanatqa jatqyzýǵa bolady. Jýyrda «Nur Otan» partııasynyń bastamasymen «Meniń Týym, meniń Otanym!» aktsııasy bastalǵan bolatyn. Partııa tóraǵasynyń birinshi orynbasary Baýyrjan Baıbek Almatydaǵy «Medeý» sport bazasy aýmaǵynda alyp týdy ornatý is-sharasyna qatysyp, jurtshylyqty rámizderdi qurmetteýge shaqyrdy. Qazirgi tańda elimizdiń túkpir-túkpirinde memlekettik týdy nasıhattaý, dáripteý aktsııasy jalǵasyp jatyr. Búgin Túrkistan oblysynyń ortalyǵy – Túrkistan qalasynda da osy maqsatta bas qosyp otyrmyz. Memlekettik Týymyzdy kóterip, arnaıy mereke retinde atap ótýdiń maqsaty – patrıotızmdi nasıhattaý, qazaqstandyqtardyń Memlekettik Týǵa degen tereń qurmet sezimin qalyptastyrý», – partııanyń oblystyq fılıaly tóraǵasynyń birinshi orynbasary.

Sondaı-aq, aktsııa barysynda otanshyldyqqa shaqyratyn ánder shyrqalyp, kók Týdyń mán-mańyzyn túsindiretin keleli oılar aıtyldy. «Jas Otan» jastar qanatynyń jalyndy jastary da merekeniń ajaryn ashyp, qurdastaryn ıgi bastamaǵa shaqyrdy. Túrkistan tórindegi «Meniń Týym, meniń Otanym!» patrıottyq aktsııasyn túrkistandyqtar jyly qabyldady. Kópshilik qaýym patrıottyq ánder tyńdap, kók Týmen sýretke tústi. Jurtshylyq bir-birine «Kók Týymyz máńgi jelbirep, Qazaqstanymyz máńgi jasasyn!» degen tilekterin bildirdi.