Túrkistanda «Meniń týym, meniń Otanym!» atty patrıottyq aktsııa ótti

TÚRKІSTAN. QazAqparat – Túrkistan qalasyndaǵy «Turkistan» avtobeketinde 1 jeltoqsan – QR Tuńǵysh Prezıdenti kúni merekesine oraı «Nur Otan» partııasy jáne avtobekettiń basshylyǵynyń qoldaýymen «Meniń týym, meniń Otanym!» atty patrıottyq aktsııasy jalǵasyn tapty. Jańadan ashylǵan avtobekettiń aldyna týtuǵyrǵa kók baıraǵymyz saltanatty túrde ornatylyp, jelbiredi, dep habarlaıdy QazAqparat tilshisi.

Atalǵan shara memlekettik týdy turaqty túrde qoǵamdyq oryndarda, týrıstik nysandarda, saýda jáne oıyn-saýyq ortalyqtarynda, joǵary jáne orta arnaýly oqý oryndarynda ornalastyrý maqsatynda uıymdastyryldy. Buǵan deıin «Nur Otan» partııasy Túrkistan oblystyq fılıalynyń uıymdastyrýymen oblystyń aýdan, qalalaryndaǵy ǵımarattar men mekemelerge 50-ge jýyq tý ilinip úlgerdi. Atalǵan bastamany jurt qyzý qoldap jatyr. Merekelik jıynda «Nur Otan» partııasy Túrkistan oblystyq fılıaly tóraǵasynyń birinshi orynbasary Beısenbaı Tájibaev pen oblystyq máslıhat hatshysy Qaırat Balabıev jurtshylyqty QR Tuńǵysh Prezıdenti kúnimen quttyqtap, Elbasynyń eldi damytý jolyndaǵy eńbegine toqtaldy. Oblysta qoldaýǵa ıe bolǵan «Meniń týym, meniń Otanym!» aktsııasynyń mańyzy zor ekenin aıtty.

Aktsııaǵa qatysýshylar arasynda Túrkistan oblystyq máslıhat depýtattary, «Jas Otan» jastar qanatynyń belsendileri men Túrkistan qalalyq ishki saıasat bólimi, mádenıet bólimi, Túrkistan qalasynda ornalasqan orta arnaýly oqý oryndarynyń belsendi jastary da boldy.

Іs-shara barysynda patrıottyq ánder shyrqalyp, óleńder oqyldy. Aktsııany uıymdastyrǵan partııa fılıalynyń ókilderi kópshilikke memlekettik rámizderdi dáripteýge arnalǵan bastamaǵa qoldaý kórsetýge shaqyrdy.

Aıta keteıik, endi budan bylaı Túrkistan qalasyna kelgen qonaqtar zaman talabyna saı jaraqtandyrylǵan ári kók týy jelbirep turǵan avtobeketke keletin boldy.