Túrkistanda «Men – donormyn, ózgege úmit syılaımyn!» aktsııasy ótti
TÚRKІSTAN.QazAqparat – Túrkistan qalasynda «Men – donormyn, ózgege úmit syılaımyn!» atty aktsııa ótti. Oblystyq qoǵamdyq damý basqarmasynyń «Jastar resýrstyq ortalyǵy» MKK men «Jas Otan» jastar qanatynyń birlese uıymdastyrýymen ótken sharaǵa júzge jýyq adam qatysyp, qan tapsyrdy, dep habarlaıdy QazAqparat tilshisi.
Aktsııaǵa «Jas Otan» jastar qanatynyń músheleri, Kentaý qalasy men Ordabasy, Otyrar aýdandyq jastar resýrstyq ortalyqtarynyń qyzmetkerleri jáne qala turǵyndary men erikti jastar qatysty. Sondaı-aq, «Aqparat taldaý ortalyǵy» men «Din máselelerin zertteý ortalyǵy» jáne «Óńirlik rýhanı jańǵyrý» jobalyq keńsesiniń qyzmetkerleri de atsalysty. Sharada jastardy tolyq tekserýden ótkizgen dárigerler qant mólsheri, gemoglobın kórsetkishi men túrli aýrý belgileriniń bar-joǵyn zerthanalyq jolmen anyqtady. Sodan keıin ǵana donor bolýǵa múmkindik berdi. Atalǵan aktsııa jastarǵa qan men onyń komponentterin qaıta quıý arqyly adam ómirin qutqaryp, densaýlyǵyna qaýip-qater tóngen jandardyń ómirin uzartýǵa múmkindik bar ekendigin uǵyndyrý boldy.
Qanǵa zárý naýqastarǵa qoldaý kórsetýdi qolǵa alǵan ortalyq aldaǵy ýaqytta da is-sharany jalǵastyrýdy josparlap otyr.
