Túrkistanda memlekettik qyzmetshiler baspanaly boldy
Oblys ákimi Ómirzaq Shókeev túrkistandyqtardyń qýanyshyna ortaqtasyp, Halyqaralyq áıelder kúni qarsańynda baspanaly bolǵan názik jandarǵa páter kiltterin tabys etti. Bul kúni san túrli kásip ókilderi: quqyq qorǵaý salasynyń ókilderi, áskerı qyzmetshiler, dárigerler, muǵalimder, áleýmettik sala qyzmetkerleri, mádenıet, turmys jaǵdaıy tómen otbasylar jańa qonys ıeleri atandy. Óńir basshysy áıelderdi aldaǵy 8 naýryz merekesimen quttyqtap, ár otbasyǵa baıandy baqyt tiledi.
«Oblys kóleminde árbir mereke qarsańynda jańa nysandardy paıdalanýǵa berý, halyqqa páter kiltin tabystaý sekildi ıgi sharalar dástúrge aınaldy. Memleket qamqorlyǵynyń arqasynda, búgin de qanshama shańyraq shattyqqa bólenip otyr. Qyzmet babymen jańa oblys ortalyǵyna kóship kelip, óńirdiń ósip-órkendeýine zor úles qosyp júrgen ózderińizge yqylastymyz erekshe. Barshańyzdy shyn júrekten quttyqtaı otyryp, jańa baspanalar sizderge baqyt ákelsin dep tileımin», – dedi oblys ákimi.
Ómirzaq Estaıuly turǵyndary kún saıyn kóbeıip jatqan Túrkistan shaharynda aldaǵy ýaqytta da memleket tarapynan turǵyn úımen qamtamasyz etýge kóńil bólinetindigin jetkizdi. Óńir basshysy óz oshaqtarynyń tabaldyryǵyn attaǵan jańa qonys ıeleriniń shańyraǵynda bolyp, jaıylǵan dastarhannan dám tatty.
Memlekettik baǵdarlamamen «Otyrar» yqshamaýdanynda 336 páterli 5 qabatty 6 turǵyn úı paıdalanýǵa berildi. Búgingi qýanysh ıeleri – 15 otbasy. Kópqabatty páterler qurylysy qarqyndy júrip jatqan shaharda jyl sońyna deıin 7 qabatty 24 turǵyn úı qurylysy aıaqtalyp, 1452 páter ıeleri qonys toıyn toılaıdy.
