Túrkistanda memleketten sýbsıdııa «alyp beretin» alaıaq ustaldy
SARYAǴASh. QazAqparat – Túrkistan oblysynyń Saryaǵash aýdanynda sýbsıdııa alyp berýge ýáde etken kúdikti 30-ǵa jýyq turǵyndy aldap soqqan. Qazirdiń ózinde jábirlenýshilerge keltirilgen shyǵyn 2,5 mıllıon teńgege jýyqtaǵan, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, jergilikti turǵyn aýdandyq polıtsııaǵa aryzdanǵan. Onyń aıtýynsha, kúdikti jeke kásipkerlikpen aınalysý úshin memleket tarapynan qaıtarymsyz 1 mıllıon aqsha alyp beretinine sendirip, 100 myń teńgelerin alǵan. Budan bólek, aýdandyq polıtsııa bólimine birneshe turǵynnan osyǵan uqsas aryzdar túsken. Kúdikti olarǵa da 750 myń teńge kóleminde sýbsıdııa alyp beretinin aıtyp, 80 myń teńgeden jınap alǵan.
Atalǵan qylmysty ashý maqsatynda tártip saqshylary jedel-izdestirý sharalaryn júrgizip, kúdiktiniń jeke-basyn anyqtaǵan. Ol óz úıinen ustaldy.
Qazirdiń ózinde osy qylmystyq is boıynsha 30-ǵa jýyq jábirlenýshi atalmysh azamattyń atyna aryz túsirgen. Degenmen tergeýshiler kúdiktiniń budan basqa da qylmystarǵa qatystylyǵyn anyqtaý ústinde. Kúdikti qamaýǵa alynyp, «Alaıaqtyq» babymen sotqa deıingi tergeý amaldary júrgizilýde.
