Túrkistanda mektep salýǵa arnalǵan bıýdjettik ótinimdi qoldaý qajet - depýtat
ASTANA. QazAqparat - Túrkistan qalasynyń mektep qurylysyna arnalǵan bıýdjettik ótinimin tolyq qoldaý qajet. Bul týraly búgin Memleket basshysynyń Parlamenttiń 4-sessııasynda qoıǵan mindetterin talqylaýǵa arnalǵan Parlamenttegi «Nur Otan» partııasy fraktsııasynyń jınalysynda depýtat Nurtaı Sabılıanov aıtty, dep habarlaıdy QazAqparat tilshisi.
«Qaıta qurylǵan ákimshilik aýmaqtyq birlikter Túrkistan oblysy men oblys ortalyǵy Túrkistan qalasy jáne respýblıkalyq mańyzy bar Shymkent qalasyna keletin bolsaq, biz qazir úsh jylǵa arnalǵan respýblıkalyq bıýdjetti jumysqa aldyq. Ony talqylaý kezinde biz Túrkistan oblysyna, Túrikstan men Shymkent qalalaryna baılanysty sýmen jabdyqtaý, sý burý jobalaryn, ınfraqurylymdy damytý, áleýmettik nysandar, sonyń ishinde mektepter salýǵa berilgen ótinimderdi basymdyq negizde qoldaýymyz kerek», - dedi deptýtat.
Onyń aıtýynsha, úsh jyldyq bıýdjette Túrkistan men Shymkent qalalarynda oqýshylar ornynyń tapshylyǵy kórsetilgen.
«Túrkistan qalasy boıynsha 12 myń oryn tapshy. Al olar qazir bes mektep salýdy usynyp otyr. Sondyqtan Túrkistan qalasy boıynsha salynatyn mektepterge berilgen ótinimderdi tolyqtaı qanaǵattandyrýymyz qajet. Shymken qalasynda da jaǵdaı osy. Eń úlken másele - óńirlerde mektep salý. Sonynmen qatar Túrkistan qalasy boıynsha jobalyq-smetalyq qujattamasy jasalatyn bolsa, onda eń birinshi sýmen qamtamasyz etýdi, sý burýdy jáne ınfraqurylymyn damytýdy júzege asyrý kerek dep oılaımyn», - dedi Nurtaı Sabılıanov.
Óz kezeginde Parlamenttegi «Nur Otan» partııasy fraktsııasynyń jetekshisi Gúlmıra Isımbaeva úsh jyldyq bıýdjette mektepter salýǵa jáne olardy seısmıkalyq turaqtandyrýǵa ne bári 15 mlrd teńge bólinip otyrǵanyn aıtty.
«Bul óte az. Bir Túrkistan qalasynyń ózinde 12 myń oqýshy orny tapshy. Demek bir myń oryndyq 12 mektep salynatyn bolsa kem degende 12 mlrd teńge tek Túrkistannyń ózine ketedi. Shymkent qalasy, basqa óńirlerde de oryn jetispeýshiligi bar. Sondyqtan mektep salýǵa qarajat bólý máselesin qoldaý kerek, kóterý kerek», - dedi fraktsııa jetekshisi.
Foto: otyrar.kz
