Túrkistanda mektep-ınternat ujymyna 20 mln teńgeniń granty tabystaldy
TÚRKІSTAN. QazAqparat - Túrkistan oblysynda ustazdar kúni merekesi atalyp ótti. Aımaq basshysynyń onlaın rejimindegi quttyqtaýyna qala-aýdannan 500-den astam úzdik muǵalim tikeleı qosylyp, tyńdaýǵa múmkindik aldy, dep habarlaıdy QazAqparat tilshisi.
Óńirdegi 55 myńnan astam muǵalimdi tól merekemen quttyqtaǵan óńir basshysy Janseıit Túımebaev ustazdar qaýymynyń bolashaq urpaqty tárbıeleýdegi róliniń mańyzy zor ekenin aıtty. Saltanatty basqosýda aımaqtaǵy 5 ardager ustaz ben 20 muǵalim oblys ákiminiń «Alǵys hatymen» marapattaldy. Al Qazyǵurt aýdanyna qarasty Jambyl Qapparov atyndaǵy №5 oblystyq mamandandyrylǵan fızıka-matematıkalyq mektep-ınternatynyń ujymyna quny 20 mln teńge bolatyn «Orta bilim beretin úzdik uıym» grant tabystaldy.
«Búgingi tól merekelerińiz erekshe ýaqytta, Elbasynyń Qazaqstan halqyna arnaǵan jańa Joldaýymen qatar, jańadan Túrkistan oblysy bolyp qurylǵan kezeńde ótýde. Nursultan Ábishuly Nazarbaev «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty keshegi Joldaýynda halyqty baspanamen qamtamasyz etý, densaýlyq saqtaý, bilim men ǵylymdy damytý, ony qarjylandyrýdy jalpyulttyq ónimniń 10 paıyzyna deıin jetkizý, polıtsııa men sot júıesin, memlekettik basqarýdy jetildirý, atalǵan salalardaǵy qyzmetkerlerdiń kásibı biliktiligi men áleýmettik qorǵalýyn arttyrý sekildi kóptegen mańyzdy máselelerdi qozǵap, alda atqarylýy tıis mindetter aıqyndap berdi. Sonymen qatar, Elbasy Joldaýda bilim salasyna asa nazar aýdaryp, sybaılas jemqorlyqtyń táýekeldiligi kemimeı, pedagogtardy jáne qyzmetkerlerdi jumysqa qabyldaýda keleńsiz jaǵdaılardyń oryn alyp otyrǵandyǵyn atap ótti», - dedi oblys ákimi.
Aıta keteıik, sońǵy jyldary oblystaǵy daryndy oqýshylar halyqaralyq jáne respýblıkalyq deńgeıdegi 100-den astam bilim saıysta júldeger atandy. Óńir sońǵy úsh jylda matematıka jáne jaratylystaný baǵytyndaǵy pánderden respýblıkalyq olımpıadalarda «Eń úzdik olımpıadalyq komanda» ataǵy men ІІ, ІІІ júldeli oryndardy ıelenýde. Respýblıkalyq olımpıada jáne ǵylymı jobalar qorytyndysy boıynsha bilim uıymdarynyń jyl saıyn 100-digi anyqtalyp, marapattalady. Bıyl solardyń qataryna oblysymyzdyń tórt orta bilim berý uıymy enip otyr. Atap aıtsaq, olar - Túrkistan qalasy, N.Nekrasov atyndaǵy №9 mektep-gımnazııasy men Kentaý qalasyndaǵy «ıAssaýı» jáne «Iqan» jalpy orta mektepteri enip otyr.
Búgingi kúni, Túrkistan oblysynda jumysqa qabyldaý jumys.sitcen.kz portaly arqyly elektrondy túrde júrgizilýde. Osy jańa formatta qabyldaý júıesi ári qaraı jalǵastyrylyp, ashyq, jarııaly túrde iske asyrylady.
