Túrkistanda «Medıatsııa - tatýlyq bastaýy» taqyrybynda dóńgelek ústel uıymdastyryldy
TÚRKІSTAN OBLYSY. QazAqparat - Túrkistan oblystyq Qazaqstan halqy Assambleıasy «Medıatsııa kúni» respýblıkalyq aktsııasy aıasynda ashyq esik kúnin ótkizdi, dep habarlaıdy óńir basshysynyń resmı saıty.
Oblystyń barlyq qala, aýdandarynda ótken is-shara aıasynda óńir turǵyndaryna quqyqtyq keńester berilip, daýlasýshy taraptar mámilege shaqyryldy. Osy kúni oblystyq assambleıa Túrkistan qalasynda. Jıynǵa sot qyzmetkerleri jáne kásibı medıatorlar, memlekettik mekeme qyzmetkerleri, etnomádenı birlestik tóraǵalary, qoǵamdyq kelisim keńesiniń tóraǵalary qatysyp, óńirde medıatsııa isin ilgeriletý jaıyn talqylady.
«Qazaq halqy úshin bitimgershilik - bılik aıtýdyń eń ozyq ónegesi. Bılerimiz kez kelgen daýdy kelisimmen sheshe bilgendigin tarıhtan bilemiz. Búgingi medıatsııa ata-babalarymyzdyń mámilegerlik dástúriniń jalǵasy deýge bolady. Respýblıkalyq aktsııa aıasynda ótip jatqan búgingi is-shara eldiń birligin nyǵaıtyp, qoǵamdyq kelisimdi saqtaýǵa baǵyttalǵan», - dedi jıynda sóz alǵan, oblystyq «Qoǵamdyq kelisim» KMM janyndaǵy medıatsııa kabınetiniń meńgerýshisi Hasan Batsıev.
Aıta ketý kerek, búginde oblystyq Qazaqstan halqy Assambleıasy jáne qala, aýdan ákimdikteri janynda 10 medıatsııa kabıneti jumys isteıdi. Óńirde 67 kásibı, 387 kásibı emes medıatordyń tizimi jasaqtalyp, medıatsııa jelisin damytý baǵytynda osy jyly 90 is-shara uıymdastyrylǵan. Jyl basynan beri 1900-den astam daýlar medıatsııa tártibimen oń sheshimin tapqan.
